Redaksıamyzǵa Laýra Múkibaeva esimdi Qyzylorda qalasy Qyzyljarma aýylynyń turǵyny habarlasty. Jalǵyz basty ana Káýsar Sársenbaı esimdi 7 jastaǵy qyzynyń basynan ótkergen aýyr jaǵdaıyn baıandap berdi.

2016 jyly aqpannyń 18-de Káýsar mektepten qaıtyp kele jatqanda, jolda «kz 304 AV/11» «Kamaz 65115» nomerli júk kóligi qaǵyp ketken. Kólik Kórkeıtý mekemesine tıesili. Al rúlde Rýslan Qamalov esimdi jigit otyrǵan. Qyz aýyr jaraqat aldy. Taǵaıyndalǵan sot-medısınalyq saraptamasynyń 07.04.2016 jylǵy №29 qorytyndysy boıynsha, jasósipirim Káýsar Sársenbaı «Polıtravma. Aýyr jabyq bas mı jaraqaty. Bas mıynyń soǵylýy, 2-shi dárejesi. Julyn mıynyń soǵylýy. Bettiń, mańdaıdyń jabyq tinderi soǵylýy, jarylýy. Eki san súıekteriniń ortańǵy bóliginiń jabyq kóldeneń yǵysqan synyǵy. Segizkóz-jambas qosylymy ajyraýy, sol jaqty otyryqshy súıektiń yǵysqan jabyq synyǵy, kishi jambas saqınasynyń buzylýy. Oń aıaq basynyń soǵylǵan jaraqaty. Jaraqattyq shok, 2-shi dárejesi. Postravmatıkalyq aýyr dárejeli anemıa» degen qorytyndy shyǵarǵan. (maqalaǵa qosymsha retinde barlyq qujat berildi).

Káýsar 5 kún jan saqtaý bóliminde jatty. Operasıa jedel túrde jasalyp, 21 kúnge jetpeı, 19 kúnge tolǵanda aýrýhanadan ony shyǵaryp jibergen. Laýra Múkibaevanyń advokaty Gúlnár Álıaqbarova 21 kúnge jetpeı jábir kórgen adam aýrýhanadan shyǵyp ketse, jaraqaty jeńil bolyp sanalatynyn aıtqan.

Káýsar úıge kelgennen keıin jaǵdaıy kúrt nasharlap, aıaǵy isip ketken. Amaly taýsylǵan ana qaryzdanyp Astanada qyzynyń aıaǵyna operasıa jasatady. Dárigerler taǵy da ota jasaý kerektigin aıtyp otyr. Alaıda jalǵyz basty ana oǵan qajetti qarjyny taba almaı, qınalyp otyrǵan jaıy bar.

Laýra hanymnyń ózi Qyzylorda qalasynyń İİD Rýslan Qamalovtyń ústinen aryzdanǵan. Alaıda sot júrgizýshini emes, 7 jastaǵy Káýsar Sársenbaıdy kináli dep taýyp is jabylǵan. Káýsar adamdar júrýge bolmaıtyn jerden ótti degen ýáj aıtqan.  Alaıda, Laýra hanymnyń aıtýynsha Qyzyljarma aýylynda baǵdarsham da, jol belgisi de joq. Káýsardyń anasyna aıtýy boıynsha, júrgizýshi telefonmen sóılesip kele jatqan.

«Jeti jastaǵy qyz qalaı kináli bolady? Aýyr jaǵdaıdaǵy qyzymdy kóterip, barmaǵan jerim joq. Alaıda barlyǵy júrgizýshiniń sózin sóıleıdi. Ádilettilik qaıda? Bul zańnyń álsizdigi me?» deıdi ashynǵan ana.

«Qamshy» portaly Qyzylorda qalasy Qyzyljarma aýylynda bolǵan oqıǵaǵa qatysty, sot sheshimin, medısınalyq saraptamany, tergeý amaldary kezindegi materıaldardy zańgerge jiberdi. Olar istiń mán-jaıymen tanysqannan keıin zań turǵysynan durys-burystyǵyn anyqtaıtyn bolady.

Qazir kishkentaı Káýsardyń jaǵdaıy nashar. Jıi talyp qalady eken. Dárigerler basyna qatty zaqym kelgenin aıtady. Bir jyl buryn ǵana júgirip, oınap júrgen bala qazir ne istep, ne qoıǵanyn bilmeıtin jaǵdaılary jıi bolady eken.

Dárigerler Káýsarǵa medısınalyq kómek kerek ekeni aıtyp otyr. Alaıda Káýsardan bólek alty aılyq balasy bar jalǵyz basty ana jumyssyz ekenin aıtady.

Laýra hanymnyń kómek surap barmaǵan jeri, baspaǵan taýy qalmapty. «Nur Otanǵa», Qyzylorda oblystyq İİD, Qyzylorda oblysynyń prokýratýrasyna da  barǵan. Alaıda barlyq jerde kómektesetinin aıtýmen ǵana shekteletinine nalıdy.

«Táýelsizdigimizge 25 jyl tolǵanda Qyzylordaǵy mınıstrlikten adamdar kelgen. Men olarǵa óz jaǵdaıymdy aıtyp, kómek suradym. Arqamnan qaǵyp shyǵaryp saldy. Biraq áli kúnge deıin esh nátıje joq. İİD polkovnıgi Hamıtbekovke de bardym. Ol da kómektesetinin aıtyp shyǵaryp saldy. Alaıda mine bir jyl boldy, eshqandaı kómek kórsetilmedi» deıdi Laýra hanym.

Káýsardy qaqqan júk kóligi tıesili mekemeniń basshysy Talǵat Qalmurzaevqa barǵan ýaqytta oqıǵa bolǵan kúni rúlde otyrǵan Rýslanǵa  100 myń teńge kólemindegi qarajatty qol hatpen bergenin aıtyp, onyń kóshirmesin Laýra hanymnyń qolyna ustatqan. Sonymen qatar, sot kináli dep tapsa taǵy da qarajat beretinin aıtqan. 

«Rýslan Qamalov qyzdyń jaǵdaıyn bilý úshin, 4, 5 ret qana tamaǵyn kóterip keldi. Odan bólek eshqandaı 100 myń teńge bermedi. Ol jigitti bilemin, jumysyn jasap, tynysh ómir súrip júr. Al meniń qyzym kólik apatynyń zardabyn tartyp jatyr» deıdi Laýra hanym.

Qamshyger: Ásem Álmuhanbet