Qazaqstandyq mektep oqýshysy qazaqtyń ulttyq bıi «Qara jorǵa» bıleıtin temir robot qurastyrdy.  Bul týraly QazAqparat habarlaıdy.

Semeı qalasyndaǵy Nazarbaev Zıatkerlik mektebiniń 11 synyp oqýshysy Ádil Ordaev erekshe robot jasap shyǵardy.
Aıta keterligi, ártúrli kúrdeli qımyldar jasaýǵa beıimdelgen bul bıoloıd  robottar mekteptegi robototehnıka sabaǵy barysynda qurastyrylǵan.

Bul jaıynda Ádil Ordaevtyń ózi bylaı deıdi: Biz áýeli robottardy jasap shyqtyq. Artynan olarǵa arnaıy baǵdarlamalar jazdyq. Bul jumystarǵa bir aıǵa jýyq ýaqyt jumsaldy. Nátıjesinde bıshi robottar tobyn jasaqtadyq»

Ádildiń jetekshisi, ınformatıka jáne robototehnıka pániniń oqytýshysy Baqytbek Orynbaevtiń aıtýynsha, álemde bıshi bıoloıdter jıi kezdesedi eken.

Jobany jasaý, árıne, ońaıǵa túspegen. Baǵdarlamasy tez jasalǵanymen, 18 bólshekten quralǵan motordy ulttyq bıge kóndirý ońaı bolmapty. «Alaıda talmaı izdenip, tabandylyq kórsetý arqyly nátıjege jettik deıdi», - ónertapqyshtar.

- Robotty tek qana bıletkizbeı oǵan jan berý kerek dep oılaımyn. Sondyqtan biz robottardy bıletkizý kezinde árbir qozǵalysty saqtaý kezinde ózimizdiń júregimizdiń kishkene bóligin berdik dep sanaımyz. Bolashaqta olar tek qana «Qarajorǵa» ǵana emes, «Qamajaı» bılerin de bıleıdi degen oıdamyn, - deıdi jas ónertapqysh Ádil Ordaev.

Ádildiń robototehnıkamen aınalysyp júrgenine 4 jyl bolǵan. Osy ýaqyt aralyǵynda ol túrli baıqaýlarǵa qatysyp úlgeripti. Ózi jasap shyǵarǵan robottardy ol jaqynda Elordadaǵy «Astana» konsert zalynda «Uly dala muragerleri» atty kórme-qoıylymda ótken Nazarbaev zıatkerlik mektepteriniń talantty oqýshylarynyń ǵylymı jobalary kórmesinde tanystyrdy.

Esterińizge sala keteıik, 2015 jyly Pavlodar bıznes-kolledjiniń stýdentteri ózderi jasap shyǵarǵan robotqa "Qara jorǵa" bıletken bolatyn. 

Jobanyń avtory Eger Koptıkov robotty 2 aptadaı ýaqyt ishinde qurastyrǵanymen, oǵan bı baǵdarlamasyn jazýǵa 1 aıǵa jýyq ýaqyt ketkenin, sondaı-aq bul robottyń bastapqy nusqasy ǵana ekenin jáne jobany ári qaraı damytatynyn habarlaǵan bolatyn. 

Degenmen, qalyń kópshilik jas ónertapqyshtardyń bul áreketterin joǵary baǵalap, Jelide jarıalanǵan tómendegi vıdeony kóptep tamashalaǵan bolatyn.