Rejıser Qanat Beısekev amerıkalyqtar asyrap alatyn Qazaqstan balalary jaıynda túsirilgen «Bala» atty fılmniń tusaýyn kesti. Qanat Beısekeevpen tengrinews.kz tilshisi suhbattasyp qaıtty. 40 mınýtqa sozylatyn fılmdi túsirý úshin avtor 5 myń dollar qarjy jumsaǵan.

Aıta keterligi, fılm bir ǵana kameraǵa túsirilgen. 22 aqpan kúni Chaplin kınoteatrynda fılmniń alǵashqy premerasy ótti.

Fılm jelisi shet eldikter asyrap alǵan jetim balalar jaıynda órbıdi. Joba 8 túrli oqıǵaǵa negizdelgen.

«Men negizi 11 oqıǵa túsirgenmin, biraq fılmge 8-i ǵana engen. Túsirilim barysynda men naǵyz qazaqtardy, naǵyz talantty balalardy jolyqtyrdym. Ár adamnyń basynan keshken oqıǵasy ár túrli. Olar amerıkalyq otbasynyń mahabbatyna bólenip ósken balalar bolsa da, ózderiniń qazaq ekenderin ishteı sezip júredi. Meniń maqsatym olardyń Amerıkadaǵy ómirleri jaıynda, sondaı-aq Amerıkada tárbıelengen qazaq balalarynyń birneshe jyldardan keıingi kelbeti jaıynda túsirý boldy. Kartına «janashyr» adamdardyń qosqan aqshalaryna túsirildi. Eń alǵash qarjy jaǵynan kómektesken Álisher esimdi azamat boldy. Ol meniń múmkindikterime senip, qolyma 100 dollar tapsyrdy. Jalpyhalyqtyq kómekten keıin 5 myń dollar jınaldy», - dedi Qanat Beısekeev.

Fılmniń alǵashqy keıipkeri 2015 jyly Fıladelfıada túsirildi. Kóp otbasy BAQ ókilderimen baılanysqysy kelmeı, fılmge túsýge qarsylyq tanytyp jatty.

Fılmge túsýshi keıipkerler ózderiniń Qazaqstandyq ekenderin jaqsy biledi. Tipti, bir asyrandy qyz Aqtóbede turatyn týǵan anasyna jıi baryp turady eken. Beısekeevtiń aıtýynsha, fılm keıipkerleri túsirilimnen keıin óz týǵan ata-analarymen kezdesýdi armandaıdy.

Fılmde balalar ózderin qalaı asyrap alǵandary jaıynda jáne buǵan korrýpsıanyń da qatysy baryn aıtyp beretin sátteri bar.

Onyń aıtýy boıynsha, asyrap alǵannan keıin Qazaqstanǵa qaıtyp kelgen balalar jaıynda taǵy bir fılm túsirmekshi. Rejıser ári qaraı da derekti fılmder túsirýmen aınalysatynyn aıtty.

Eske sala ketsek, 1999 jyldan beri shet eldikter elimizden 8805-den asa jetim asyrap alǵan bolatyn. Elimizde sol balalardyń árqaısysynyń taǵdyryna alańdaıtyn azamattardyń bary qýantady.  

Aýdarǵan: Gúlim JAQAN