Mektep dırektory Aıdarhan Ázimbaev pen esepshi Maıra Edilbaevanyń soty búgin sot zalynda emes, Ǵ.Jubanova atyndaǵy oblystyq fılormonıada ótti. Munda qaladaǵy mektep, kolej dırektorlary túgel jınalǵan. Áriptesteriniń kózinshe aıyptalýshylarǵa Aqtóbe qalalyq №2 sotynyń sýdıasy Gúlnár Tilepova úkim shyǵardy.

«Aıyptalýshy Aıdarhan Ázimbaev QR Qylmystyq kodeksiniń 366-babynyń 2-bóliginde kózdelgen qylmysty jasaýda kináli dep tanylyp, oǵan ózine tıesili múlki tárkilensin. Bilim júıesindegi basqarý laýazymdardy atqarý quqyǵynan ómir boıy aıyra otyryp, 3 jyl merzimge bas bostandyǵynan aıyrý jazasy taǵaıyndalsyn», - dedi sýdıa Gúlnár Tilepova.

№24 mekteptiń dırektory qyzmetine jaqynda taǵaıyndalǵan Aıdarhan Ázimbaevtyń úsh balasy men zeınet jasyndaǵy ata-anasy bar. Ol áriptesteriniń kózinshe qamaýǵa alyndy. Al, paraqorlyqqa deldal bolǵan esepshi Maıra Edilbaevaǵa aıyppul túrindegi jaza taǵaıyndaldy. Ol 3 mıllıon teńge aıyppuldy bir aı ishinde óteýi tıis. Bolmaǵan jaǵdaıda sot úkimi ózgerýi múmkin.

«Maıra Edilbaeva QR Qylmystyq kodeksiniń 368-baby 1-bóligine sáıkes kináli dep tanylyp, onyń ózine tıesili múlki tárkilensin. Bilim berý júıesindegi bas esepshi laýazymyn atqarý quqyǵynan ómir boıy aıyra otyryp, paranyń on eselengen somasy mólsherinde, ıaǵnı 3 mln teńge kóleminde aıyppul jazasy taǵaıyndalsyn. Úkim zańdy kúshine engennen keıin bir aı ishinde aıyppuldy tólenýi tıis. QR QK 41-babynyń 3-tarmaǵyna sáıkes aıyppul tóleýden jaltarǵan jaǵdaıda QR QK 368 babynyń 1-bóligine sáıkes bas bostandyǵynan aıyrý jazasyna aýystyrylýy múmkin», - dedi sýdıa Gúlnár Tilepova.

Qańtar aıynda Aqtóbe qalasyndaǵy №24 lıngvısıkalyq mektep-gımnazıanyń dırektory Aıdarhan Ázimbaev mekteptiń bas esepshisi Maıra Edilbaeva arqyly asqana meńgerýshisinen 300 myń teńge para alǵan. Basshyǵa asqana meńgerýshisi kórsetilgen qarjyny eki bólip bergen. Keıin mektep dırektoryn Sybaılas jemqorlyqqa qarsy is-qımyl Ulttyq búrosynyń oblystyq departamentiniń qyzmetkerleri ustady. Qos aıyptalýshy da kinálaryn tolyq moıyndap, sottan keshirim surady. Sondaı-aq, Aqtóbe qalalyq №2 sotymen oblystyq bilim basqarmasynyń atyna jeke qaýly shyǵaryldy.