Shymkenttik anımatorlar jasaǵan «Qazaq eli» týyndysy Kaırde ótken H halyqaralyq anımasıalyq fılmder forýmynda bas júldeni jeńip aldy. Bul jóninde 24.kz jańalyqtar qyzmeti habarlaıdy.

Otandyq ónim mýzykalyq súıemeldeýi men rejısýralyq úılesimi jaǵynan da qos atalym ıegeri atandy. Anımasıalyq fılmde qazaq handyǵynyń negizin qalaǵan Kereı men Jánibektiń balalyq shaǵy men el basqarǵan kezderine deıingi aralyq qamtylǵan. «Saq Jebe» kınostýdıasynyń anımatorlary múltfılmge sońǵy úlgidegi 2D jáne 3D tehnologıalaryn qoldanǵan. Qazaq handyǵynyń 550 jyldyǵyna oraı jasalǵan týyndy ótken jyldyń mamyr aıynan bastap kórsetilimge shyqty. Al, Mysyrdaǵy 50-den astam eldiń anımasıalyq jumystary qatysqan baıqaýda týyndy qazaq tilinde kórsetilipti. Soǵan qaramaı álemniń nazaryn ózine aýdarǵan.

Batyrhan Dáýrenbekov, «Qazaq eli» anımasıalyq fılminiń rejıseri: - Kann festıvaliniń kórkemdik keńesshisi Brıjo Santos degen rejıser boldy, sol kisi aıtady: «buny barlyq elderde kórsetý kerek, óıtkeni mynaý patrıottyq taqyryp, barlyq elderge, barlyq elderdiń balalaryna tán nárse. Osy jaǵynan alǵan kezde bul óte utymdy. Birinshiden, sizderdiń tarıhtaryńyzdy bilip jatyrmyz, ekinshiden, bizdiń balalarǵa degen berer tárbıesi mol» dep túsinip jatyr.