Belgili dintanýshy Qaırat Joldybaıulynyń aıtýynsha, bul qurylystyń saldarynan musylmandar men hrıstıan dini ókilderiniń arasynda arazdyqtar týyndaýy múmkin. Ol musylmandar men hrıstıandardy bir molaǵa jerleý erteń túrli túsinispeýshilikterdi týǵyzatynyn eskertip otyrǵandaı. Bul týraly oıyn ol Facebook áleýmettik jelisindegi jeke paraqshasynda jazady.
«Ulttyq panteon qurylysyna qyrýar qarjy bólinip jatyr. Ol jaǵyna men aralaspaı-aq qoıaıyn. Biraq máseleniń din mamany retinde men aralaspasam bolmaıtyn taraby bar. Panteonda musylmandar men ózge din ókilderi bólinbegen. Qatar jerlenýde. Bul sharıǵatqa da, qazaq dástúrine de qaıshy. Ǵulamalar basqa din ókilderiniń zıratyna jerlengen musylmandy qaıta jerleý kerektigin aıtqan. Munyń aldy alynbasa bolashaqta dinı dúrdarazdyqqa, tipti ultarazdyqqa sebep bolýy múmkin. Erteń basqa din ókilderiniń árýaǵyna qurmet retinde zırat basynda araǵyn iship, sharıǵatqa qaıshy túrli áreketterin jasap jatqanyn kórgen musylman balasy qandaı kúıde bolýy múmkin?!», - deıdi din mamany Qaırat Joldybaıuly.
Aıta keteıik, Astana qalasynda tanymal adamdar jerlenetin Ulttyq panteonnyń qurylysyna búdjetten 1,7 mıllıard teńge qarjy bólingen bolatyn.
Pikir qaldyrý