Almaty oblysynda qazirgi tańda jetim jáne ata-anasynyń qamqorlyǵynsyz qalǵan  3 myńnan astam bala bar, onyń 83%-i otbasylyq tárbıege ornalastyrylǵan, atap aıtsaq, qorǵanshylyq pen qamqorshylyqta – 2479, patronattyq tárbıede – 63, otbasylyq úlgisindegi balalar úılerinde 35 bala tárbıelenýde. Al, qalǵan 536 bala bilim, densaýlyq saqtaý, áleýmettik qorǵaý júıesiniń ınternattyq mekemelerinde.

Bıyl, ıaǵnı 2017 jyly Qazaqstan Respýblıkasyndaǵy Bala quqyqtary jónindegi ýákil jáne Almaty oblysynyń ákimdigi men prokýratýrasy arasynda «Balalar úıisiz Jetisý» jobasyna qol qoıyldy. Bul jobanyń maqsaty 2020 jylǵa qaraı jetim jáne ata-anasynyń qamqorlyǵynsyz qalǵan balalarǵa arnalǵan mekeme tárbıelenýshileriniń 50%-dan astamyn otbasylardyń tárbıesine berip, sonyń nátıjesinde atalǵan mekemelerdiń sanyn aıtarlyqtaı azaıtyp, olardy otbasy men balalyqty qoldaý ortalyqtaryna qaıta qurý josparlanǵan.

Osy oraıda aıta keteıik, joǵaryda atalǵan toptaǵy balǵyndar sany jyldan jylǵa azaıýda. Máselen, 2014 jyly oblysta jetim jáne ata-anasynyń qamqorlyǵynsyz qalǵan 3 568 bala bolsa, qazirgi kezde olardyń sany 455 balaǵa qysqarǵan.

"Sońǵy jyldary balalar úılerinen alynyp, otbasylyq tárbıege ornalastyrylǵan órender sanynyń kóbeıgendigin de atap aıtý qajet. Mysaly, 2014 jyly – 109 bala, 2015 jyly – 145,   2016 jyly 109 bala otbasylyq tárbıege ornalastyryldy. Sonyń nátıjesinde 2015 jyly Esik qalasyndaǵy jáne Jambyl aýdany Qaraqastek aýylyndaǵy sábıler úıi, Úshtóbe balalar úıi jabyldy. Jalpy, «Balalar úıisiz Jetisý» joba aıasynda bıyl oblystyq búdjetten 120 balany patronattyq tárbıege ornalastyrýǵa 140 mln. teńge, 20 otbasy úlgisindegi balalar úıin ashýǵa 90 mln. teńge qarastyryldy, - dedi Almaty oblysynyń óńirlik komýnıkasıalar qyzmetinde ótken brıfıńte oblystyq bilim basqarmasy qorǵanshylyq jáne qamqorshylyq bóliminiń basshysy Alıam Molotova".

Almaty oblysynyń óńirlik komýnıkasıalar qyzmeti.