Meni bizdiń eldegi memlekettik mekemelerdiń konsert berý qyzmeti kópten tolǵandyryp júrgen. Búgingi Taıjan Qalmaǵambetov atyndaǵy Jezqazǵan fılarmonıasynyń Qaraǵandy óńirin aralaı kelgendegi konsertin syrt kóz retinde tamashalap biraz oı túıdim. Bul ujym keshe Shahan kentinde (50 shaqty adamǵa), búgin Maıqudyqta (20 shaqty adam) kesh ótkizdi. Erteń Suryptaý (Maıqudyqtan sál árirek jer, Sortırovka) eldi mekeniniń mádenıet úıinde konsertin qoıady.
Josparda kórsetilgen, bekitilgen konsertter. Komersıalyq joba emes. Árıne, jarnama az, nasıhat jumysy jetkilikti jasalynbaǵan soń kelýshi de az. Mádenıet basqarmasy "Óz boqtaryńdy ózderiń shuqyńdar" degen syńaı tanytqan. Bóten qalaǵa aldyn ala bılet taratýshylar jiberip, jarnamadan bólek onyń basqa da shyǵyndaryn óteý qymbatqa túsedi. Sodan soń osyndaı júrdim-bardym keshter uıymdastyrylady. Bul máseleler kádimgideı memlekettik deńgeıde qolǵa alynýy tıis. Mádenıet basqarmasy jyldyń basynda jospar suraıdy, jyldyń aıaǵynda, kvartal sońynda atqarylǵan jumystardyń esebin suraıdy. Josparly konsertterge kómegin tıgize almasa "jospar oryndamadyńdar" dep nemenege kijinedi? Nemese "keremet, jospar oryndaldy" dep nemenege qýanady?
Keshegi Shahandaǵy konsertke Qaraǵandy oblysy Mádenıet basqarmasynyń ókili bardy degenge senbeımin. Sebebi, anaý Shahan turmaq, irgedegi Maıqudyqqa kelgen joq. Ondaı adamdar ne úshin basqarma basqaryp otyr? Ásheıinde alashapqyn bolyp júretin jandaıshaptary qaıda?
Bul kez kelgen fılarmonıanyń basqa jaqqa barsa basynan ótkeretin jaǵdaıy.
Endi basqa jaǵynan qaraıyqshy bul máselege. Arqadaǵy dástúrli ánshiler qaıda? Bir teriniń pushpaǵyn ılesip júrgen Ǵalym Muhamedınniń (QR eńbek sińirgen artısi) janynan nege tabylmady? Men aıtaıyn, on ánshi bar desek sonyń jeteýi toıda. Jetiskennen júrmegen shyǵar. Biraq, toı-tomalaq ańdyp júrgenderi haq. Bul da ónerge degen ógeı kózqarastyń kesiri.
Mádenıet salasy ishinen irip-shirip jatyr. Anyǵy osy. Barlyq salada sol. Bir kúni EKSPO qurylysy sekildi "gúrs" etip qulaıdy-aý...

Aısultan Jaqypov