Men mektepte oqyp júrgen kezde, mektepti wi-fi jelisimen tolyqtaı qamtyǵan edi. Biraq, biz onyń paıdasynan góri, zıanyn kóp kórdik desek te bolady. Nelikten? Sebebi, sheksiz ınternet álemine syılaǵan múmkindikten soń oqýshynyń bos ýaqyty bolsyn nemese bolmasyn ol ózine tıimdi emes, bosqa ýaqyt óltiretin ispen aınalysýǵa yntyǵyp turatyn. Sabaq ýaqytynda nemese úziliste bolsyn dostarym túrli telehıkaıalar qarap, ártúrli oıyndar oınap otyratyn. Kópke topyraq shashýdan aýlaqpyn.Árıne, barlyq oqýshy bolmasa da, bir qaryn maıdy shiritetin qumalaqtardyń kesirinen sol WI-FI jelisin 1-2 aı ótken soń úzip tastaǵan bolatyn. Onyń sebebi, paıdalaný kórsetkishi belgilengen mejeden asyp, tym kóp bolyp ketkeni jaıly estidim. Oǵan bólingen qarjynyń sheginen shyǵyp ketken eken. Bir túsinbegen nársem nelikten mektepte osyndaı erkin, oqýshynyń nazaryn basqa iske aýdarýǵa múmkindik beredi nemese qatań baqylaýǵa ala otyryp, kerek emes dúnıelerge paıdalanýdyń joldaryn nege qarastyrmaıdy eken?
Árıne, bul jasalyp jatqan ıgi isterdiń barlyǵy derlik bizdiń sanaly hám sapaly bilim alýymyz úshin. Ony biri jete túsinse de ,ekinshi bir oqýshy osy múmkindikti tıimdi paıdalanýdy durys ańǵarmaı jatady. Esh bógetsiz tegin istep jatqan ınternet jelisi aspannan tógilip jatqan joq ǵoı. Ol da memleket qarjysynan bólinip, jastardyń kemeli bilim alýy úshin jasalyp jatqan ıgi isterdiń biri. Osynyń uǵynatyn oqýshylar qatary kóp bolsa, bizdiń elimizdiń bilim júıesindegi ózgeristerdiń kóbi derlik ońǵa basyp, tezirek alǵa jyljýshy edi. Sebebi, úlken isterdiń sońynda osyndaı baıqaýsyz usaq dúnıeler turady. Al sol usaq dúnıeniń ózi úlken kúshke ıe bola alatyny taǵy bar.
Ornatylǵan tegin WI-FI qyzmetiniń oqýshy men muǵalimder qaýymynyń qolyn uzartyp, kóptegen múmkindikteri syılaıtyny jáne iske asyrylyp jatqan jańa jobalardyń qarqyndy damýy úshin degen maqsatpen joǵary qarqynda keń etek alyp úlgergenine kúá bolamyz. Oqýshylardyń áleýmettik jelige nemese serıaldar kórýine belgili bir deńgeıde shekteý qoıǵany da anyq. Alaıda qazirgi alǵyr shákirttiń qandaı jolmen bolsyn , óz qalaýyn jasap alatyny aqıqat. Iaǵnı, qoıylǵan shekteý, olar úshin asa qatty bóget bola almaýda.
Múmkin, aldaǵy ýaqytta ıgi bastamanyń shynaıy paıdasyn jete túsinetin oqýshy qatary artyp, bosqa shyǵyndaýdyń qajeti bolmasyn ańǵaratyn shákirtter jıiler. Bári de ýaqyt enshisinde. Eń bastysy, el bolashaǵyn ustar alǵyr shákirt ózine syılanyp jatqan sheksiz múmkindik pen naǵyz baqyttyń qadirin túsinse eken...
Bizdiń aldyńǵy tolqyn aǵa-apaılarymyzda ondaı múmkindik múlde bolmaǵan edi. Olar mektepke jańa kitaptar kelse qýanyp, shynaıy baqytty sol dep túsinetin edi ǵoı. Bar ýaqytyn kitaphanada, izdeniste ótkizip, mekteptegi bir kompúterdiń baryn mise tutatyn.
Tilegen Kógershin
