Kásipqoı boksshy Qanat Islamnyń jankúıerleri súıikti sportshysy týraly tyń derekterdi jańa saıttan biletin bolady. Jańa aqparattyq resýrsty jasaýdy jýrnalıs Berik Sultan men baǵdarlamashy Saǵyn Úsenuly qolǵa alǵan. Bul týraly QazAqparat jazdy. Atalǵan saıt http://kanatislam.com/ adresi boıynsha aldaǵy kúnderde júmys isteıtin bolady.
Saıtta boksshynyń jekpe-jeginen kásibı foto, vıdeoaqparat, kelesi urys qashan jáne kimmen ótetini jaıly maǵlumat qazaq, orys, aǵylshyn tilderinde der kezinde jarıalanbaq. Atalǵan saıt jóninde jasaýshy jýrnalıs Berik Sultan bylaı deıdi: «Búginde Qanattyń jekpe-jegin kóre almaı sýsap júrgen jankúıerler kóp. Máselen meniń ózim qashan kimmen judyryqtasatynyn bilmeımin, eki kúnnen soń osy áleýmettik jeli arqyly bilip otyramyz. Sapaly sýret, beıneaqparat ta az. Sondyqtan, ony jurtshylyqqa keńinen nasıhattaý qajettigi týyp otyr. Bul jóninde Qanattyń ózimen, promoýteri Nelson Lopespen sóılestik. Olar isimizdi quptady. Qanattyń ár kezdesýinde olarmen tikeleı baılanysta bolamyz. Aqparatty promoýter Nelson Lopes jiberip otyrady dep kelistik. Saıt operatıvti jumys isteıtin bolady. Amerıkada jekpe-jek kúndiz ótse, bizde tún bolady ǵoı. Soǵan qaramastan, túnde kelgen aqparatty túnde salatyn bolamyz»
Qanat Islam áýesqoı boksshy retinde Qytaı Halyq Respýblıkasy Ulttyq qurama komandasynyń quramynda Beıjiń Olımpıadasynyń qola júldegeri, Chıkagoda ótken Álem chempıonatynyń (2007) jáne Azıa oıyndarynyń (2006) qola júldegeri. Qytaıdyń 10 dúrkin chempıony boldy. 2010 jyly atajurtqa kóship kelgen soń 2012 jylǵa deıin «Astana Arlandary» kásibı klýbynyń múshesi boldy. Qazir kásipqoı bokspen aınalysyp jatqan Qanat - «Nelson» promoýterlik klýby atynan sharshy alańǵa shyǵyp keledi. Kásipqoı boksqa aýysqaly beri Qanat 18 kezdesý ótkizip, onyń 15-inde jekpe-jekti merziminen buryn aıaqtaǵan.
13 qyrkúıek otyz jasqa tolatyn Qanat Islammen aldaǵy kúnderde «Qamshy» portaly ınternet konferensıa ótkizetin bolady.
Qamshy-aqparat
