Búgin bilim kúni qarsańynda Astana qalasynda bes jańa mektep ashyldy. Atap aıtqanda ár qaısysy 1200 balaǵa arnalǵan №73, №74, №75, №76, №78 mektepteri Astana qalasynyń balalary úshin aldaǵy ýaqytta qyzmet etetin bolady. №75 mektep-gımnazıanyń ashylýyna arnaıy barǵan Elbasy Nursultan Nazarbaev elimizdiń barsha oqýshylaryn bilim kúnimen quttyqtap, sóz sóıledi. Bul týraly Bnews.kz jazdy.

 «Búgin – bilim kúni. Bizdiń elimizde 7 600 mektepte 2 mln 600 myń bala partaǵa otyrady. Eń qýantatyny – 300 myń búldirshin birinshi klasqa barady. Olardyń sany – byltyrǵymen salystyrǵanda 70 myńǵa kóp. Bul qýantatyn jaǵdaı, sebebi bizdiń jastarymyzdyń ósip kele jatqany, halqymyzdyń ósip kele jatqany, bala týýdyń kóbeıip kele jatqany», - dedi Elbasy. Prezıdenttiń aıtýynsha Qazaqstan boıynsha táýelsizdik jyldary 1 myń mektep iske qosylǵan. «Onyń ishinde bıyl 150 mektep iske qosylady, búgin 62 mektep oqýshylarǵa esigin aıqara ashady. Mynaý Astananyń ózinde 11 mektep iske qosylady. Ol mektepterde 300 myń muǵalim sabaq beredi. Osynyń barlyǵy Qazaqstannyń bolashaqqa degen, keleshegimizge degen bizdiń kemel eńbegimiz ben maqsatymyzdy oryndaý. Sondyqtan, búgingi bilim kúnimen barshańyzdy quttyqtaımyn», - dep Prezıdent balalarǵa sáttilik tilegen.

Aqparatqa saı Astana qalasy boıynsha bıylǵy oqý jylynda 13 myńǵa jýyq bala birinshi synypqa aıaq basty.

Qamshy-aqparat