Kalachıde kesel qaıta órship jatyr. Sebebi belgisiz uıqy aýrýymen tanylǵan Aqmola oblysyndaǵy bul eldi mekende taǵy 8 adam qalyń uıqyǵa ketken. Onyń úsheýi – oqýshy eken. Bul týraly Bnews.kz KTK telearnasyna silteme jasap habarlady.
Jergilikti turǵyndardyń aıtýynsha, balalar alǵashqy qońyraý merekesinen soń úılerine qaıtyp bara jatqanda jarty jolda talyp qalypty. Taban asty uıqy qysqan jasóspirimderdi kóshede jatqan jerinen óz synyptastary taýyp alǵan. Qazir balalardyń barlyǵy aýrýhanada. Palatalarda uıyqtap jatyr. Ótken aptada Kalachı aýylynyń 5 eresek turǵyny da dál osylaı esinen tanyp qulaǵan kórinedi. Osylaısha belgisiz syrqat kalachılyqtardyń áli de esin jıǵyzar emes. Byltyr naýryzdan bastalǵan uıqyshyldyq dertten aýyldyń 50-den astam turǵyny aıaqtan qulaǵan. Al mamandar syrqattyń naqty sebebin áli kúnge anyqtaı almaı otyr.
Qamshy-aqparat
