16 naýryz kúni Qazaqstan Prezıdenti Nursultan Nazarbaev Respýblıkalyq BAQ ókilderimen kezdesý ótkizdi.

Kezdesý barysynda elbasy tilshilerdiń Parlament depýtattarynyń merziminen buryn saılaý ótkizý týraly suraǵyna jaýap berdi, dep habarlaıdy «Qamshy» portaly Aqordanyń baspasóz qyzmetine silteme jasap. 

 «Adamdar saılaýdyń bolǵanyn nege sonsha qalaıdy? Jańa saılaýdan keıin jáne úılenýden keıin keregińdi ala almaısyń degen sóz bar. Parlament 2021 jylǵa deıin saılandy, ol óz merzimin tolyǵymen atqarady», - dep jaýap berdi elbasy tilshilerdiń qoıǵan suraǵyna.

Áńgime barysynda Memleket basshysy qazirgi kún tártibindegi ózekti saýaldarǵa jaýap berdi.

Eske sala keteıik, kezdesýge qatysýshylar «Qazaqstannyń úshinshi jańǵyrýy. Jahandyq básekege qabilettilik»  atty joldaýdy iske asyrý aıasynda el ekonomıkasyn transformasıalaý úderisiniń birqatar aspektilerin, sybaılas jemqorlyqqa qarsy kúres máselelerin, qazirgi saıası jańǵyrý kezeńiniń erekshelikterin, BUU Qaýipsizdik keńesiniń turaqty emes múshesi retindegi Qazaqstannyń syrtqy saıası basymdyqtaryn, sondaı-aq basqa da mańyzdy jaıttardy talqylady.

Kezdesýge «Qazaqstan», «Habar», «MIR» telearnalarynyń, «Aıqyn» gazetiniń, «Esquire» jýrnalynyń, «Qazaqparat» aqparat agenttiginiń tilishileri qatysty.  Sonymen qatar, QR Prezıdenti kadr taǵaıyndaýdaǵy máseleler jaıynda da sóz qozǵady.