Astana polıseıleri EKSPO qarsyńynda kóshe kezip júrgen qaıyrshylar bas qalanyń kórkine nuqsan keltiredi dep ýaıymdap júr.

İshki ister departamentiniń basshysy Amantaı Áýbákirov Astanadaǵy qaıyrshylar men úısizderge qatysty jumystardyń júrgizilip jatqanyn aıtty.

«Iá, bul kúrdeli másele. Qaıyrshylardy zańdyq turǵydan ekinshi márte polısıa bólimderine shaqyra almaıdy. Birinshi ret ákeldik, úısiz qaıyrshy ekeni anyqtaldy. Biraq ol Qazaqstan Respýblıkasynyń azamaty jáne eldiń qalaǵan jerinde kún keshe alady. Sondyqtan, olarǵa qandaı da bir shara qoldanýǵa bizdiń quqymyz joq», - dedi Amantaı Áýbákirov informburo.kz tilshisine bergen suhbatynda.

«Kóbine kóshe kezetinder – kishkentaı balalarymen júrgen syǵan áıelder Olarǵa kúshtep shara qoldana almaımyz. Óz erkilerimen elden ketý úshin sharalar qoldanylǵan. Biraq, eshkim óz erkimen ketkisi kelmeıdi».

Onyń ústine qaıyr tileıtinder bir jerde otyrmaıdy, bir bazardan bir bazarǵa, bir kósheden bir kóshege aýysyp júredi.

«Olar kishkentaı balalarymen júrgendikten kúshtep elden shyǵarý sharalary qoldanylmaıdy, zańda ruqsat etilse de. Bul másele de qarastyrylýy tıis. EKSPO ýaqytynda olar astanamyzdyń kórkin qurtady dep ýaıymdaımyz», - dedi Amantaı Áýbákirov.

Qaıyrshylardan qutylý jaıynda oıdy alǵashqy bolyp ákimniń orynbasary Andreı Lýkın aıtqan. Sondaı-aq, ol 2017 jyldan bastap buryn isti bolǵandardy bas qalaǵa kirgizbeý jóninde usynys tastady. Onyń usynysyn Jergilikti polısıa qyzmetiniń jetekshisi Baqytjan Maılybaev qoldap, shara qoldaný kerektigin aıtty.

EKSPO-2017 Halyqaralyq kórmesi Astana qalasynda maýsym aıynyń 10-y men qyrkúıektiń 10-y aralyǵynda ótedi.