Aqtóbedegi balabaqsha ákimshiligindegiler balalardyń shaı iship jatqany túsirilgen sýretke qatysty túsinik berdi. Aıta keteıik, osyǵan deıin áleýmettik jelilerde jáne messendjerlerde balalardyń dastarqanynyń bos turǵany, al tárbıeshilerdiń kerisinshe mol dastarhan ústinde otyrǵan sýreti taralǵan bolatyn. Sýretten tárbıeshilerdiń ústelinde jemis-jıdek, et jáne basqa da taǵamdar turǵanyn, al balalardyń ústelinde tek bir tárelke men birneshe baýyrsaq turǵanyn kórýge bolady, dep habarlaıdy Tengrinews.kz

Aqtóbedegi № 12 balabaqshanyń ádiskeri bul sýrettiń olarǵa qatysy joq ekenin aıtyp otyr.

"Bul balalar bizdiń balabaqshamyzda tárbıelenip jatqan joq. Biz qalalyq bilim bólimine túsinikteme jazdyq. Bul bizdiń balabaqsha emes. Bizdiń ǵımaratymyz emes. Tárbıeshiler de basqa. Sizder osynda kelip bizdiń toptaǵy balalardy kórseńizder bolady. Taralyp jatqan sýrettiń Aqtóbedegi 12 balabaqshaǵa qatysy joq", - dedi mekeme qyzmetkeri.

Al Aqtóbe qalalyq bilim bólimindegiler qazirgi ýaqytta qaladaǵy balabaqshalardan sýrettegi adamdardy izdestirip jatqanyn habarlady.

"Balabaqshalar arasynda saýalnama júrgizemiz, sýretti kórsetemiz. Jumystar júrgizilip jatyr. Aqtóbede túsirilgen sýret dep aıtyp jatqandyqtan, olardy tabý kerek. Sýrettegi adamdardy tapqan jaǵdaıda balabaqsha meńgerýshisine qatysty sharalar qoldanamyz. Sebebi bulaı bolmaýy tıis", - dedi orta jáne mektepke deıingi bilim berý sektorynyń meńgerýshisi Gúlnaz Myrzaǵalıeva.