Reseıdiń aımaqtarynda eriktiler «Antımaıdan» toptaryn quryp jatyr. Olardyń maqsaty bılikke kómektesip, opozısıanyń halyqty arandatýyna qarsy turmaq eken, bul týraly Azattyq radıosy jazdy. «Antımaıdan» qurýshylar Reseıde «Maıdan» uıymdastyrýdy kózdegenderge saq bolý kerek ekenin aıtady. «Halyq jasaqtary» bılikke járdemdesip, Ýkraınada bıliktiń aýysýyna yqpal etken «Maıdan senarıin» Reseıde boldyrmaýǵa tyrysady.

«Antımaıdan» eriktiler toby 10 adamnan quralady jáne topty basqaratyn brıgadıri bolady. Eriktiler toptary jańadan qurylǵan «Antımaıdan keńesi» janynan ashylady. Bul keńes Reseı áskerı jáne arnaıy kúshteriniń ardagerleri men belsendilerdiń, pravoslav azamattar odaǵy ókilderiniń basyn biriktirgen uıym.  «Izvestıa» gazeti eriktilerdi «quqyq qorǵaý organdarymen tyǵyz baılanysta qyzmet etedi» dep jazǵan. Olardyń deregi boıynsha, keńes tóraǵasy Evgenıı Shabaev «Antımaıdan» toptarynyń Ýkraınamen shektesetin jáne ortalyq aımaqtarda jumystaryn bastaı beretinin, bolashaqta mundaı toptardyń Reseıdiń barlyq aımaqtarynda qurylatynyn aıtqan. Shabaev eriktilerdiń mindetin naqty túsindirmegen. «Konstıtýsıalyq qurylym men úkimetti bılikten taıdyrýdy kózdeıtin Batys yqpalyna qarsy turý úshin orys halqyn aqparattandyrý» jolynda qyzmet etemiz deıtin ​Keńes, úkimetke qarsy belsendilerdiń qyrkúıektiń 14-i kúni ótetin jalpyulttyq aımaqtyq jáne jergilikti saılaýlar kezinde el ishinde dúrbeleń týdyryp, kóshe sherýlerin ótkizýi múmkin ekenin eskertti. Sondyqtan olar úkimettiń múddesin qorǵaıtyn balama sherýler men sharalar ótkizbek. Keńes músheleri – Reseı barlaý qyzmetiniń ardagerleri men Reseı pravoslav azamattary odaǵynyń jetekshileri, zań shyǵarýshylar, Ońtústik kazaktar uıymy men «Nochnye Volkı»  («Túngi qasqyrlar») motoklýbynyń ókilderi. 

Qamshy-aqparat