Sergeı Pýdovkınniń prodúserlik ortalyǵy qytaılyq telearnaǵa, qytaılyq kompanıaǵa nemese ártisterge qatysty shaǵym túsirmegen. Bul týraly Vıtastyń prodúseri Sergeı Pýdovkın málimdedi.

Aıta keteıik, qazirgi ýaqytta Vıtastyń múddesin qytaılyq advokattar kontorasy qorǵaıdy eken. Bul kontora qazaqstandyq ánshi Dımash Qudaıbergenniń I am a Singer baıqaýynda «Opera №2» ánin oryndaýyna baılanysty shaǵym túsirgen. 

«Men shaǵym túsirgen joqpyn. Vıtas ta shaǵymdanbaǵan. Shyn máninde meniń kelisimim boıynsha meniń qytaılyq seriktesim bolyp keletin kompanıa shaǵym túsirgen. Bul kompanıa QHR terıtorıasynda ıntellektýal múlikti qorǵaýmen aınalysady. Ózderińiz kórip otyrǵandaı, bul zań buzýshylyq osy memlekettiń terıtorıasynda boldy. Sondyqtan sol elde osyndaı proses júrgizilip jatyr. Nátıjesin birge kóremiz», — dedi Pýdovkın.

Eske salaıyq, Vıtastyń ókilderi shaǵymdy Hunan arnasynyń ústinen túsirgen. Oǵan Dımash Qudaıbergenniń I am a Singer baıqaýynda «Opera № 2» ánin aıtýy sebep bolǵan. Ázirshe telearna buǵan qatysty resmı pikir bildirgen joq. Al Dımash Qudaıbergenniń PR-menedjeri Alpamys Sharımov bul ándi oryndaý konkýrs rejıseriniń tańdaýy bolǵanyn habarlaǵan. Al keıin daýsyn reseılik ánshimen salystyrǵandarǵa Dımash Qudaıbergenniń ózi jaýap bergen. «Men «Ekinshi Vıtas» emespin!» dep málimdegen edi Dımash Qudaıbergen.