Aqpannyń toǵyzy kúni Erlan Tynymbaıuly «Qazaqstan» Respýblıkalyq Teleradıokorporasıasy» Aksıonerlik Qoǵamynyń Basqarma Tóraǵasy bolyp taǵaıyndaldy. Sodan beri qyryq kún.
Sonymen, «Qazaqstan» teleradıokorparasıasynyń tóraǵasy qyzmetine kelgen Erlan Qarınniń «Qazaqstan» telearnasy redaksıalyq aqaparattyq saıasatyn ózgertý boıynsha bastamalary sońǵy aptanyń basty jańalyǵyna aınaldy deýge bolady. Feısbýk áleýmettik jelisinde qyzý talqyǵa túsken bul taqyryp qoǵamnyń pikirin bir jaqtan shyǵardy deske artyq aıtaqanymyz emes. Óıtkeni, ulttyq arnanyń jańa formatqa kóshkenine qoǵam tolyqqandy qoldaý kórsetip jatyr, muny áleýmettik jelidegi reaksıadan aq baıqaýǵa bolady. Árıne syn da aıtylyp jatyr. Biraq Erlan Qarınniń ózi áleýmettik jelilerde qoǵamnyń pikirin oqyp, birden suraqtarǵa jaýap berip júrgenińe feısbýk qoldanýshylary kýá. Ol, jýrnalısterdiń aıtýy boıynsha efır aıaqtalysymen birden qyzmetkerlermen jınalys jasap, qoǵam tarapynan aıtylǵan syndardy, usynystardy eskerip, ony túzetý joldaryn dereý sheship otyrǵanyń anǵarý qıyn emes.
Ulttyq arna jańa formatqa kóshkenine bir aptaǵa jýyq ýaqyt ótti. Keshe jarıalanǵan birqatar ólshemderge qaraǵanda ótken dúısenbiden beri ulttyq arnanyń jańa baǵdarlamalary kún saıyn shamamen 18-25 paıyzǵa ósti. Konstıtýsáıylyq reformaǵa qatysty telekópir jasap, bir stýdıaǵa bılik pen opozısıa ókilderin jınap, órkenıetti túrde, ashyq pikirlerin bildirýge jaǵdaı jasaǵany qoǵamnyń kóńilinen shyqty. Ulttyq arnadan kórine bermeıtin saıasattanýshylar, qoǵam qaıratkerleri de salmaqty oılaryn efırden aıta bastady. Kózge súıel bolǵan, ulttyǵymyzǵa, mádenıetimizge, dilimizge jat «kelin» sıaqty sońy joq úndilerdiń serıaldaryn ulttyq arna efırinen múlde alyp tastady, al túrikterdiń tek tarıhı serıaldaryn qaldyrýdy josparlap jatqany taǵy bar. «Tań sholpan» «Basty aqparat» syndy jobalardy jańa formatqa kóshirý de aıtarlyqtaı nátıjege ákeldi. Bir ǵana mysal, qazaq televızıasynyń maıtalmandary Qymbat Dosjan men Danıar Menilbek ulttyq arnanyń «Basty aqparat» jańalyqtaryn júrgizýshileri bolǵany halyqty qalaı qýantqany úlken baǵa emes pe?! Jańalyqtardyń mazmuny turǵysynan «KTK jańalyqtary» nemese «Informbúro» jańalyqtarynan kem túspeıtin, elimizdiń ózekti máselelerin ashyq aıta bastaǵany eń basty jaǵymdy ózgeristiń biri. «Basty aqparat» saraptamalyq jobasy iske qosylyp, elimizdiń jas ári bilikti sarapshylary qoǵam aldyna shyǵyp, ózekti saıası máseleler boıynsha óz pikirlerin aıtýda. Jahanda júrip jatqan prosester kún tártibine shyǵyp jatqan kezde, olarǵa dereý taldaý jasap, sarapshylyq pikirin tikeleı efırde aıtýy – halyqty álemdegi kúrdeli máseleler boıynsha aqparattandyrýdyn jaqsy tásili boldy. Muny E.Qarınniń kásibı saıasattanýshy retinde ulttyq arnaǵa alyp kelgen kásibı jańalyǵy, qosqan úlesi deýge bolady.
Ulttyq arna «Dısneı» kompanıasynyń eń jaqsy múltfılmderin qazaq tiline aýdaryp, sapaly dúnıelerdi balalar nazaryna usynýy – keler urpaqqa qazaq tilin myqtap nasıhattaý degen sóz! Al Ulybrıtanáınyń eń ataqty «Sherlok» serıalyn aǵylshyn tilinde, qazaq sýbtıtrimenen aptasyna bir ret, 00:00den keıin kórsetý qoǵamnyń nazaryna eń kóp ilingen sheshim boldy jáne Sherlokty osylaı kórsetý sheshimin ásirese jastar qoldady. Qoǵamnyń basym kópshiligi bul ıdeıamen kelisip otyr, oǵan dálel bolatyn Jarylqap Qalybaı, Ámirjan Qosanov, Rasýl Jumaly, Asqar Qumyran, Ǵabıden Jákeı sıaqty basqada tanymal aǵa býyn ókilderi men qazaq tiliniń janashyrlary qoldaý sózderin aıtýda.
Sondaı-aq, Ulttyq arnanyń web saıty jańaryp, mobıldik qosymshasy jetildirilgenin de aıryqsha aıta ketý kerek.
Erlan Qarın ózin jańa qyrynan kórsetti. Telearnaǵa tek suhbat berip qana shektelip júrgen ol, jalpy telearnanyń basshylyǵyna bir aı buryn ǵana kelip talaı máseleni sheship tastaýǵa úlgerdi, ulttyq arnanyń aqparattyq, shyǵarmashylyq, redaksıalyq saıasatyn múlde jańa baǵytqa buryp, telearnada ulttyń múddesine saı saıasat júrgize bastady. Memleketke shynymen adal qyzmet etemin degen nıet bolsa mundaı reformalardy 1 aıda iske asyrýǵa bolatynyń kórsetken Erlan Qarın «memlekettik saıasat ıdeology» statýsyn odan ári kúsheıte túskeni kúmán týdyrmaıdy. Qarınniń ózi ózgeristerdiń basym kópshiligin kúzde bastaımyz dep málimdegen bolatyn. Jalpy, Erlan Qarınniń ulttyq arnany kúrdeli ózgeristerdi qoǵammen tyǵyz baılanysta, talqyda, oı almastyrýda ótkizýi memlekettik ınstıtýttarǵa úlgi bolatyn daıyn joba.
Oıdy qoryta aıtar bolsaq, arnadaǵy ózgeristermen Qarın tek bir arnaǵa emes, búkil televızıa salasyna jańa trendtter qalyptastyrýda. Osyndaı ózgeristerdi jasaý ýaqyt óte basqa arnalarda da túptin túbinde oryn alatyny anyq! Solaı jańa aqparattyq júeı de qalyptasýy múmkin. Negizinen, ulttyq arnanyń reformasy – jalpy qazaq televızıasynyń reformasy, qazaq jýrnalısıkasynyń jańarýy, memlekettiń aqparattyq qaýipsizdiginiń kúsheıýin, bılik pen qoǵam arasyndaǵy birlikti saqtap, ulttyń potensıalyn kóterip, ulttyń modernızasıalyq prosesin júrgizý bolyp tabylady.
Nurǵalı NURTAI
