Qyzylorda oblysynyń ákimi  Qyrymbek Kósherbaev Qyzylorda qalasyndaǵy birqatar qurylys nysandarynyń jumystarymen tanysty dep habarlaıdy oblys ákiminiń baspasóz qyzmeti.   

Syrdarıa ózeniniń sol jaǵalaýynda jańa turǵyn úı qurylystaryn júrgizý úshin jer tegisteý jumystary bastaldy. Onda 18 kóp qabatty úı jergilikti kásipkerlerdiń jeke qarjysy esebinen boı kótermek. Qala ákimi Nurlybek Nálibaevtyń aıtýynsha, munda aǵymdaǵy jyldyń qyrkúıek aıynda keminde 20 kópqabatty úı salynady dep kútilýde.

-Sonymen qatar biz áleýmettik nysandar qurylysy boıynsha kásipkerlermen birlesip jumys jasap jatyrmyz. «Abý Ser» kompanıasy 320 oryndyq balabaqsha qurylysyn salýǵa kiristi. Taǵy bir kásipker munda saýda ortalyǵyn ashpaq,- dedi Nálibaev.

Oblys ákimdiginiń janynda arnaıy shtab quryldy.Sońǵy shtab otyrysynda Jastar saraıynyń, onkologıalyq ortalyqtyń, meshittiń, «Bolashaq» ýnıversıteti qalashyǵy qurylystarynyń  jobalary maquldanyp, qoldaý kórsetildi.    

Aımaq basshysy jaýapty tulǵalarǵa sol jaǵalaýda qurylys júrgizýge nıetti kásipkerlerdi qoldaý qajettigin eskertti. Bul óz kezeginde jańa jumys oryndarymen qatar salyq bazasyn ulǵaıtýǵa da septigin tıgizedi.  

 Sondaı-aq Qyrymbek Kósherbaev qurylys nysandarynyń  arhıtektýralyq kelbeti ulttyq, shyǵystyq úlgige saı   bolý qajettigin aıtty.

-Injenerlik-ınfraqurylym máselelerin sheshý óz qolymyzda. Saraptamalar jaqyn arada  daıyn bolǵan soń búdjettik ótinim jasaý úshin máslıhattyń kezekten tys sesıasyn ótkizý kelisilgen,- dedi oblys ákimi.      

Osy kúni Demesinov kóshesindegi 230 páterlik kópqabatty 4 úıdiń alǵashqy kirpishi qalandy. Bul turǵyn úı «Óńirlerdi damytý-2020» baǵdarlamasy aıasynda «Samuryq Qazyna» jyljymaıtyn múlik qory» AQ-men birlesip salynýda jáne aǵymdaǵy jyldyń jaz maýsymynda paıdalanýǵa berilmek.   

Sonymen qatar oblys ákimi saıası qýǵyn-súrgin qurbandaryna arnalǵan  eskertkishti qaıta jańǵyrtý jumystarymen tanysty. Eskertkish aýmaǵyna aleıa salynyp, túngi jaryqshamdar ornatylyp, asfált jol tóseledi.  Qaıta jańǵyrtý jumystary saıası qýǵyn-súrgin jáne asharshylyq qurbandaryn eske alý kúnine qarsy aıaqtalmaq.    

 Budan bólek aımaq basshysy Qorqyt ata kóshesi aýmaǵyndaǵy 5,8 shaqyrym jolǵa júrgizilip jatqan jóndeý jumystaryn kórdi (Qazybek bı kóshesinen bastap «Qyzylorda-Jezqazǵan» trassasy aralyǵy).  Bas merdiger «ÝAD» JSHS asfált tóseý, túngi jaryqtandyrý, joldyń eki jaǵyna aryq pen  avtobýs aıaldamalaryn salý jumystaryn júrgizýde.

Bir sózben aıtqanda  Ulystyń Uly kúni  «Naýryz» merekesi qarsańynda qyzylordalyqtar Astanadan úlgi ala otyryp, Syrdarıanyń sol jaq jaǵalaýynda jańa qala qurylysyna kirisip ketti.