Búgin,  8-qyrkúıek kúni Qazaqstan Jazýshylar odaǵynyń Ádebıetshiler úıinde Qytaı Halyq Respýblıkasy Memlekettik syılyǵynyń ıegeri, Qazaqstandaǵy halyqaralyq aqyndar músháırasynyń birneshe ret jeńimpazy atanǵan aqyn Serik Qapshyqbaıulynyń 80 jyldyq mereıtoıyna arnalǵan «Aıdan ary, kúnnen beri …» atty jyr keshi ótedi.

S.Qapshyqbaıuly Qytaı Halyq Respbýlıkasynda týyp, 1956 jyly Shyńjań ınstıtýtynyń til-ádebıet fakúltetin tamamdaǵan. Eńbek jolyn «Shyńjań oqý-aǵartý» jýrnalynda bastap, 1984 jyly «Tarbaǵataı» jýrnalynyń bas redaktory bolady. 1986 jyly «Jyldar arasynda» atty tańdamaly óleńder jınaǵy úshin QHR Memlekettik syılyǵyn alǵan.  1994 jyly atajurtqa qonys aýdarǵan aqyn birneshe jyr jınaqtary men prozalyq shyǵarmalar jazdy. Elimizde «Baldyrǵan» jýrnalynda bólim redaktory bolyp qyzmet atqardy. Ol «Qazaqstan Táýelsizdigine 10 jyl» merekelik medalimen marapattaldy.

Aqynnyń buǵan deıin «Tas», «Jylqy ishinde ala júr», «Joq», «Kúnshyǵys», «Jer basyp júrgender», «Bala» atty kitaptary jaryq kórgen. Qapshyqbaıulynyń jyr keshine ádebıettegi úzeńgilesteri men izbasar inileri, sondaı-aq belgili óner sheberleri qatysady. Kelińizder, keshtiń qonaǵy bolyńyzdar.

Qamshy-aqparat