Dımash Qudaıbergen Azıanyń eń tanymal ánshisi nomınasıasyna usynyldy, dep habarlaıdy tengrinews.kz. Bul týraly ánshiniń PR-dırektory Alpamys Sharımov keshe, ıaǵnı 26 naýryz kúni habarlady.
«Dostar! Taǵy da taqym qysatyn sát keldi. Erteń Tikeleı efır 19:30-da Dragon TV(东方卫视) arnasynda Azıanyń eń úlken masshtabtaǵy marapaty China Top music Awards sharasy ótedi. Dımashymyz Best Asia popular singer ("Azıanyń Eń tanymal ánshisi") nomınasıasyna usynylǵandardyń qatarynda. Alǵash qatysyp otyrǵan xalyqaralyq marapattan úmitimiz zor!!! Osy keshte Azıanyń ánshilerimen birge qyzyl kilemnen ótip, óner kórsetetin bolady. Bári de Sizderdiń tilekterińizben! Al, jaqsylyqqa jorıyq!!!», - dep jazdy ánshiniń dırektory ári dosy.
Al Dımash óziniń ınstagram parqashasynda bylaı dep jazdy:
«Shanhaı, Dears, erteń 15:00 qyzyl kilemde (red carpet)/ 19:30 Mercedes Bens Arena-da kezdeskenshe!!! Azıanyń eń úlken masshtabtaǵy China Top music Awards marapatynda ádemi kóńil-kúı syılaýǵa tyrysamyn!!! Jaqsy kóremin».
Eske sala keteıik, keshe Dımash Qudaıbergen I am a Singer baıqaýynyń 10-shy kezeńinde 3-oryn alyp, baıqaýdyń fınalyna shyqqan bolatyn. Bul kezeńde qazaqstandyq ánshi «Umytylmas kún» ánin qazaq jáne qytaı tilinde oryndady. Aıta keteıik, ánniń avtory Dımash Qudaıbergenniń ózi. Al sózin Oral Baıseńgir jazǵan.
