«Ertis» fýtbol klýbynyń basshylyǵy, bapkerleri men oıynshylary Eýrazıalyq Toptyń Pavlodar óńirindegi eki kásipornyn aralady. Sportshylar «Qazhrom» TUK» AQ fılıaly – Aqsý feroqorytpa zaýyty men «Qazaqstan elektrolız zaýyty» AQ-nyń óndiristik prosesterimen tanysty. Mını-fýtboldan kásiporyn quramalarynyń músheleri, ardagerler men sport súıer qaýymnan quralǵan jankúıerler olardy erekshe yqylaspen, qýana qarsy aldy dep habarlaıdy qamshy.kz.
Eýrazıalyq Toptyń Pavlodar oblysynda ornalasqan kásiporyndarynyń qyzmeterleri – «Ertis» fýtbol klýbynyń basty jankúıerleriniń qatarynda. Ár kezdesý saıyn júzdegen eýroazıattyqtar atalǵan ujymǵa qoldaý kórsetý úshin stadıonǵa asyǵady. Ári ERG – klýbtyń negizgi demeýshisi.
«Ertis» FK basshylyǵynyń uıǵarymymen klýb oıynshylarynyń óńirdegi óndiristik kásiporyn ujymdarymen júzdesýi aldyn ala josparlanǵan. Osylaısha, jattyǵý jumystary men Qazaqstan premer lıgasy oıyndary arasyndaǵy úziliste fýtbolshylar «Qazhrom» TUK» AQ fılıaly – Aqsý feroqorytpa zaýytyna keldi. TMD aýmaǵyndaǵy eń alyp feroqorytpa seh sanalatyn №6 sehty aralaǵan fýtbolshylar joǵarykómirtekti ferrohromdy balqytý úrdisiniń qalaı júzege asatynyn óz kózderimen kórip, alyp kásiporynnyń óndiristik qýatyna tańdanyp qaıtty. Odan soń Aqsý qalasyndaǵy dene shynyqtyrý jáne saýyqtyrý ortalyǵyna bettep, Aqsý feroqorytpa zaýytynyń «Metalýrg» komandasynda tálim terip júrgen órender, jankúıerlermen kezdesti. Tipti jetkinshekterge kishigirim sheberlik sabaǵyn da ótkizdi. Osy oraıda atalǵan klýbta óńirdiń basty komandasynda dop tebetin oıynshylardyń izbasarlary jelkildep ósip kele jatqanyn atap aıtqan jón. Máselen, Borıs Kýsevol qazirden «Ertistiń» qosalqy quramynda óner kórsetse, Izat Quljanov, Danıl Denısov, Tımýr Japargazınov, Nıkıta Prohorenko, Vácheslav Gordıenko jáne Ildar Slámovtar «Ertistiń» fýtbol ortalyǵynda sheberlikterin shyńdap júr.
– Jasym toǵyzda. Úsh jyldan beri osy «Metalýrg» klýbynda fýtbolmen aınalysyp júrmin. Bul komandalyq oıyn bolǵasyn onda gol salý da ońaı emes. Sol úshin aldymen dene áleýetimdi shynyqtyryp, jattyǵýdyń tehnıkalyq qyrlaryna erekshe kóńil bólip júrmin. Men de, dostarym da «Ertis» oıynshylarynan úlgi alamyz. Ári oıyn saıyn olardyń qarsylastan basym túskenin qalaımyz, – dedi Eskendir Ernazaruly.
Odan soń oıynshylar bıyl on jyldyq mereıtoıyn atap ótkeli otyrǵan ERG-diń eń jas kásiporny – Qazaqstan elektrolız zaýytyna bardy. Sportshylar bastapqy alúmını óndirisin tanýǵa erekshe talpynys tanytty. Alúmınıdi elektrlızdeý sehyn aralaǵan sportshylar ónimniń qaıdan alynatynyn, qalaı óndirilip, qaı salada keńinen paıdalanylatyny týral egjeı-tegjeıli surap bildi. Komandany ásirese óndiris prosesteriniń avtomattandyrylý deńgeıi tań qaldyrdy.
– Biz qazirgi zaman talabyna saı qýatty ári aýqymdy óndiris oshaqtary – Eýrazıalyq Top kásiporyndaryn qýana araladyq. Onyń ústine bul adamdar bizge árdaıym qoldaý kórsetip, bizdiń komandamyzdyń bir múshesi bolǵany qýanatady. Osy oraıda fýtbolshylarǵa jankúıerdiń yqylasy erekshe áser etetinin aıta ketken abzal. Sondyqtan aýyr jumys atqaryp júrgenderine qaramastan, oıynǵa keletin qyzmetkerlerge alǵys aıtamyz. Bizge kórsetip otyrǵan qoldaýlaryńyz úshin kóp rahmet!, – dedi «Ertis» FK dırektory Oırat Sadýov «QEZ» AQ ujymymen kezdesýde.
– Bizdiń ujymdy bul kezdesý jańa beleske jetelep, yntalandyrdy. Óıtkeni osyndaǵy sportshylar óz isiniń shyn myqtylary, kásibı sheberlerimen júzdesti. Qazaqstan elektrolız zaýytynda fýtbol – №1 sport. Sol sebepti sporttyń naqty osy túrin damytýǵa erekshe kóńil bólemiz. QEZ quramasy top ishilik, qalalyq jáne oblystyq deńgeıde uıymdastyrylatyn jarystardyń bárine belsene qatysady. Ári bizdiń áriptesterimiz turaqty jattyǵyp, fýtboldaǵy sheberlikterin úzdiksiz jetildirip keledi, – dedi «QEZ» AQ kásipodaq komıtetiniń tóraǵasy Aleksandr Klımenko.
Qos kezdesý sońynda taraptar tartý taralǵylaryn jasap, estelik sýretke tústi. Odan soń jankúıerler sportshylardan qoltańba aldy.
Pavlodar oblysy ákimdigimen áleýmettik mańyzy bar jobalardy júzege asyrý jóninde jasalǵan Memorandým aıasynda Eýrazıalyq Top biraz jyldan beri «Ertis» fýtbol klýbyn qoldaýǵa qarajat qarastyryp keledi. ERG Top kásiporyndary ornalasqan Aqtóbe, Qostanaı jáne Pavlodar oblystarynyń ákimdikterimen de 13 jyldan beri turaqty turde osyndaı memorandýmdar jasasyp keledi.
Sońǵy bes jylda (2012-2016 jj.) Eýrazıalyq Toptyń Qazaqstandaǵy barlyq kásiporyndary qyzmetkerlerdi áleýmettik qorǵaý men áleýmettik salany qarjylandyrýǵa, aımaqtardy áleýmettik-ekonomıkalyq damytýǵa, demeýshilik pen qaıyrymdylyqqa 103 mlrd teńgeden astam qarjy jumsady.
