Islamnyń qasıetti kitaby Qurandy tarıhta tuńǵysh ret qazaq tiline aýdarǵan belgili ǵulama Halıfa Altaı 25 naýryz kúni Ystambulda týǵanyna 100 jyl tolýyna baılanysty is-shara ótkizildi. Qazaqstan Ankara Elshiligi, Túrki dúnıesi ákimshilikter odaǵy, Zeıtinburyn aýdan ákimshiligi jáne Túrkıa qazaqtary bilim jáne zertteý qoǵamy tize qosa otyryp uıymdastyrǵan is-sharada Halıfa Altaıdyń tek qana dinı ǵalym emes, sonymen qatar tarıhshy, ϶tnograf, aqyn, qoǵam qaıratkeri syndy basqa kóptegen qyrlary basa kórsetildi.
Dúnıejúzi qazaqtar qaýymdastyǵynyń hatshysy Botakóz Ýatqan bıyl Astana EXPO-2017 aıasynda ótkizilgen dúnıejúzi qazaqtarynyń quryltaıy aıasynda Eýrazıa Ýnıversıteti Otyrar ǵylymı zertteý ortalyǵymen birlesip “Halıfa Altaı jáne Atamekenge Oralý” atty halyqaralyq ǵylymı praktıkalyq konferensıa ótetinin málimdedi.
Qazaqstan Ystambul Baskonsýly Erkebulan Sapıev, Zeıtinburyn aýdan ákimi Murat Aıdyn, Altaıdyń Almaty, Parıj jáne Ystambulda turatyn urpaqtary, Ystambul qazaqtary jáne túrik ǵalymdary men zıalylary da qatysqan bas qosýda Túrkıa qazaqtarynyń kósh basshylarynan Elisqan batyr týraly “Qaraly kósh” romanynyń avtory Jádı Shákenuly óz kezeginde Halıfa Altaıdyń 100 jyldyǵynyń Alashtyń da 100 jyldyǵyna tuspa-tus kelgenine basa kórsetip kezinde Bólshevık tóńkerisinen keıin bir qatar Alash qaıratkerleriniń shekaranyń ar jaǵyna ótip Óraltaıda bala oqytyp Alash rýhyn sińirgenin aıtty. Halıfa Altaıdyń Alash qaıratkerlerinen Ahmet moldadan dáris alǵanyn, sóıtip boıyna Alash rýhy men sanasyn darytqan Altaıdyń ómirin qazaq halqyna, Qazaq eline qyzmet etýge arnap ótkenin atap ótti.
Eýrazıa Ýnıversıteti Otyrar ǵylymı zertteý ortalyǵynyń dırektorynyń orynbasary, profesor Danagúl Mahatqyzy ózderinde shetel qazaqtarynyń tulǵalary jóninde qorlar men zertteý jobalary bar ekenin, bulardan biriniń Halıfa Altaıǵa arnalǵanyna kórsete kelip ótken jyly rektor Erlan Sydyqovtyń qoldaýymen Halıfa Altaı týraly halyqaralyq ǵylymı-praktıkalyq konferensıa ótkizýge sheshim qabyldaǵandyqtaryn, sol úshin daıyndyqtarynyń júrip jatqanyn atap ótti.
Túrki dúnıesi ákimshilikter odaǵynyń hatshysy dosent, t.ǵ.d. Fahrı Solaq basqaryp otyrǵan jıynnyń sońynda sóz sóılegen Mımar Sınan kórkem óner ýnıversıtetiniń profesory Abdiýaqap Qara da Halıfa Altaıdyń Túrkıa men Qazaqstannyń ortaq tulǵasy ekenine kórsete kelip 1982 jyly Túrkıa Mádenıet Mınıstrligi basylymdary arasynda Altaıdyń Túrkıa qazaqtarynyń kósh tarıhy men qazaq mádenıeti týraly “Atajurttan Anatolıaǵa” atty kitabynyń jaryk kórgenin, al bıyl bolsa 100 jyldyqqa arnalyp Ystambulda ǵulamanyń ómiri týraly túrik tilinde kitap shyqqanyn, onyń atyn sol kitapqa meńzep “Anatolıadan Atajurtqa” dep qoıǵandaryn, óıtkeni Halıfa Altaıdyń Qazaqstan táýelsizdik alǵannan keıin 1992 jyly kidirmesten atajurtqa at basyn buryn qalǵan ómirin týǵan halqyna arnaǵanyn tilge tıek etti.
İs-shara sońynda Halıfa Altaı arýaǵyna duǵa etildi jáne Túrkıa qazaqtary bilim jáne zertteý qoǵamy men Halıfa Altaıdyń urpaqtary osy sharaǵa at salysqan azamattarǵa alǵystaryn aıtyp syılyqtaryn berdi.
Ábdiýaqap Qara,Tarıh ǵylymynyń doktory, Mımar Sınan kórkem óner ýnıversıtetiniń profesory
