23 naýryz kúni «Qyzaı ana» qoǵamdyq qory Almaty oblysy Talǵar aýdany Óstemir aýlyndaǵy Qyzaı ana kóshesiniń boıynda naýryz merekelik dastarhan jaıdy. Merekelik sharaǵa aýyl turǵyndary men birge alys jaqynnan kelgen myńdaǵan azamat qatysty. Arasynda qoǵam qaıratkerleri, óner adamdary, aqyn-jazýshylar, sportshylar, qyzaı ana urpaqtary boldy, habarlaıdy Ult portaly
Merekelik shara «Qyzaı ana» qoǵamdyq qorynyń Tóraǵasy, profesor Nábıjan Muhamethanulynyń halyqty ulystyń uly kúnimen quttyqtaýy men jáne «Qyzaı ana» qory jumysyn qysqasha tanystryp, syıly qonaqtarǵa shapan kıgizdi. Nábıjan Muhamethanulynan keıin aýyl, aýdan ákimderi, qoǵam qaıratkerleriniń aq jarma tilekteri men aýyl aqsaqaldarynyń batasyna ulasty. Merekelik sharanyń kún tártibine baılanysty, Jastar men jas óspirimder arasyndaǵy sporttyq jarystar men merekelik konserttik baǵdarlama qatar bastaldy. QR mádenıet qaıratkeri, qurmet órdeniniń ıegeri Tileýbek Qojan, tanymal ánshiler Nurshat Zeıiphan, Ádil Silámhan, Asqar Ákimbek, Lálá Baqytnurqyzy qatarly bir top ánshi ónerpazdar ánnen sháshý jáship, bıshilerimiz halyqtyń kóz aıymyn qandyryp, aqyndarymyz jyr marjanyn jaýdyrdy.
Konserttik baǵdarlamanyń ortasynda «Qyzaı ana» qoǵamdyq qory uıymdastyrǵan ıgi sharalardyń marapattaýlaryna da kezek berilip turdy. Osy ıgi sharanyń biri jastarymyzdy bilim men ǵylymǵa yntalantyrý maqsatynda joǵarǵy oqý oryndarynda bilim alyp jatqan úzdik stýdentterge stependıa taǵaıyndaý. Ǵalym Nábıjan Muhamethanuly oqýdaǵy jetistikteri men qoǵamdyq jumystaǵy belsendiligi úshin Ál-Farabı atyndaǵy QazUÝ-dyń magıstranty Muqtaı Klaraǵa júz myń teńge, Ál-Farabı atyndaǵy QazUÝ-dyń 1 kýrs stýdenti Bolat Bubisaraǵa jetpis myń teńge, Tehnologıa-ekonomıkalyq kolejynyń 2 kýrs stýdenti Nurdanǵalı Jaınaǵa elý myń teńge, Tadǵar aýdany Óstemir aýyly № 14 mektebiniń 9-shy synypa oqýshysy Begaly Baısaldyǵa 50 myń teńge qarjylaı syılyq tabys etti.
Esterińiz de bolsa, «Qyzaı ana» qoǵamdyq qory Alash Orda úkimetiniń 100 jyldyǵyna oraı «Ádebıet» portalynda «Aıbyndy Alashym» atty jas aqyndar arasyndaǵy jyr músháırasyn jarıalaǵan bolatyn. Ádil qazylar jeńimpaz dep belgilegen aqyndardy marapattaý da osy Naýryz merekelik sharasynyń aıasynda ótip, jyr músháırasynyń qazylary men qor músheleri jeńipaz aqyndardy saltanatty túrde marapattady. Bıylǵy jylǵy naýryz merekelik dastarhan shyǵynyn kóterlgen qor quryltaıshysynyń biri Sabyrjan Muhamethanuly jyr músháırasynyń negizgi júlde qory 500 myń teńgeni ózi ataǵan bolatyn. Ádil qazylar alqasy Bas júldege baıanaýyldyq jas aqyn Elaman Hasenulyn laıyq dep 200 myń teńge, birinshi oryn almatylyq aqyn Tólegen Mellatqa 150 myń teńge, ekinshi oryn almatylyq jas aqyn Aıbol Islamǵalıǵa 100 myń teńge, úshinshi oryn Qoja Ahmet Iasaýı atyndaǵy qazaq-túrik ýnıversıtetiniń 1 kýrs stýdenti Ǵylymnur Kádirbaıulyna 50 myń teńge qarjylaı syılyq tabys etti. Sonymen birge «Qyzaı ana» qory aqyn Talapbek Tynysbekuly men Baltabaı Nurǵalıevke arnaıy júlde tabys etse, jas kásipker Jolshybaı Oshyrbaıuly Alash Túrsynáli men Dınara Málikke «Qyzaı ana» qorynyń atyndan arnaıy júlde tabys etti.
«Qyzaı ana» qoǵamdyq qory aqyndar arasyndaǵy músháırany osymen ekinshi jyl ótkizse, Stýdentter men oqýshylarǵa stependıany neshe jyldan beri taǵaıyndap keledi. Sonymen birge qor atynan belgili kásipker, «Qyzaı ana» qorynyń hatshysy, Almatydaǵy «Sáttibaı» fermasynyń tóraǵasy Omaráli Ábdibekuly da jyl saıyn Tadǵar aýdany Óstemir aýyly № 14 mektebiniń otbasynda qıynshylyǵy bar, oqýda ozat 5 oqýshyǵa 30 myń teńgeden qarjylaı syılyq berip keledi. Bıylda dástúrge saı 1- synyptan 7- synypqa deıingi 5 oqýshyǵa syılyǵyn óz qolymen tabystady.
Mereke sporttyq jarystarda marapatqa ıe bolǵan jastar men jas-óspirimderdiń syılyqtaryn tabys etýmen máresine jetti. Kelgen barsha qonaq arnaıy tigilgen kıgiz úılerde jáıilǵan dastarhandarǵa retimen kirip keń dastarhannan dám tatty. 4,5 saǵatqa sozylǵan merekelik shara barsha qonaqtarynyń kóńilinen shyǵyqqany bilinip, qonaqtar uıymdastrýshylarǵa alǵysyn aıtyp qaıtyp jatty. Samarhannyń kók tasy erigen Naýryz merekesinde «Qyzaı ana» qory óstemir aýylynyń turǵyndary qýanysh syılap, aqyndar men stýdent, oqýshylarǵa shabyt syılap qaıtty. Jáne qala halqyn, kásipkerlerdi aýylǵa aparý arqyly aýyl turmysyna kóz qyryn sala júrýlerine oı túıdire bildi dep oılaımyn. Osy shara arqyly jas urpaq qyzaı anadaı uly tulǵanyń ómirimen tanysyp ulyqqa umyltýǵa oı-sabaq ala bilgenine de shúbam joq.
Eskere keteıin, «Qyzaı ana» qoǵamdyq qory uıymdastyrǵan Óstemir aýylyndaǵy Naýryz merekesiniń dastarhan ár jyly bir bir áýlet ne birneshe azamat óz moıyndaryna alady. Sporttyq sharalar men jyr músháırasynyń shyǵynyn da dastarhan jáıǵan azamattar shyǵarady. Bıylǵy jylǵy Naýryz merekelik dastarhanyn «Qyzaı ana» qoǵamdyq qorynyń tóraǵasy, tarıhshy, profesor Nábıjan Muhamethanuly jáne inileri Ánýar Muhamethanuly men Sabyrjan Muhamethanuly jáıǵan edi.
«Qyzaı ana» qorynyń Naýryz merekesin Óstemir aýylynda ótkizip kele jatqanyna toqtala keter bolsaq, 2011 jyly aqyn Ábdiǵanı Pázilhanuly Talǵar aýdany Nura aýlydyq okrýgi mádenıet úıiniń basshysy bolyp turǵan kezindegi bastamasy boıynsha Talǵar aýdany Óstemir aýylyndaǵy bir kóshe Qyzaı ananyń atyna berilgen edi. 2011 jyldyń qazan aıynda sol kósheniń boıynda Qyzaı anaǵa as berilip, 2012 jyldan bastap dástúrly túrde Naýryz merekesi sol kósheniń boıynda ótip keledi. Osy 6 jyl barysynda «Qyzaı ana» kóshesin alýǵa sebepshi bolǵan, aqyn Ábdiǵanı Pázilhanuly Naýryz merekesin uıymdastrýǵa belsene atsalysyp, Naýryz merekesin júrgizip keledi.
