18 naýryzda Nú-Iorktegi Madison Square Garden arenasynda Golovkın men Djeıkbos rıngke shyǵyp, nátıjesinde upaılar sany jaǵynan jeńis Golovkınge tıesili bolǵan edi. Golovkın eshbir jekpe-jegin 12 raýndqa deıin jetkizbegen. Alaıda sol kúngi qarsylasy Djeıkbospen judyryqtasýy qıynǵa soqty.
Tóreshilerdiń biraýyzdan jeńisti Golovkınniń qanjyǵasyna baılaǵany kóshilikti qýantsa, endi biri sheshimniń ádil bolǵanyna kúmán keltirdi. Áleýmettik jelilerde Golovkınniń jeńisine nebir kúdikti pikriler jazyldy. Tipti Djeıkbostyń ózi sońyna deıin jeńiske qol jetkizetinine senimdi boldy. Ózin Golovkınnen áldeıqaıda myqty judyryqtasqanyn da aıtyp qaldy.
Álemniń burynǵy úzdik boksshylar tiziminde kósh bastaǵan Floıd Meıvezer de Golovkınniń jeńisine, sondaı-aq úzdik boksshy atanatyndaı myqtylyǵyna shúbá keltirip, tipti oǵan mazaq retinde bir esim oılap tapqan kórinedi.
«Men bir jigittiń jekpe-jegin kórdim. Sizder meniń kim týraly aıtyp otyrǵanymdy bilesizder, ol - Triple-L - sebebi ol menimen jekpe-jekke shyqsa, úsh ret jeńiler edi. Qazirgi ýaqytta men bir sportshy úshin ǵana rıngke qaıtyp oralýǵa daıynmyn. Onyń esimi - Konor MakGregor.
Men áli de belsendi boksshy bolsam, men onda... Sizder túsindińizder ǵoı. Men onyń kúl-talqanyn shyǵarar edim. Al qazirgi ýaqytta meni tek mega qarajatty jekpe-jekter qyzyqtyrady... Golovkın degen kim ózi?», - dedi Meıvezer Fighthype.com saıtyna bergen suhbatynda.
Osyndaı jaǵdaılar oryn alyp jatqanda Gennadıı Golovkınniń jattyqtyrýshysy Abel Sanches únsiz qalmady. Ol GGG-diń Denıel Djeıkobsty jeńgenine kúmán keltiretin ınternet-qoldanýshylarǵa jaýap berdi.
«Ótken senbide úsh tóreshi Golovkınniń paıdasyna sheshim shyǵardy. Sondyqtan ózgelerdiń aıtyp jatqany meni tolǵandyrmaıdy. Bul mańyzdy emes, sebebi sýdıalardyń úkimin ózgertpeıdi. Tarıhqa basqalardyń ne aıtqany emes, aıqastyń qalaı ótkeni enedi. Áleýmettik jelilerde óz pikirleri mańyzdy dep oılaıtyn «dıvandyq bapkerler» men «klavıatýralyq sýdıalar» óte kóp. Tóreshiler aıqastyń nátıjesin eseptedi, sol ǵana mańyzdy».
Sondaı-aq, Abel Sanches orta salmaqta WBA (Super), IBO, WBC jáne IBF tujyrymdary boıynsha álem chempıony Gennadıı Golovkınniń Saýl «Kanelo» Alvarespen kelise almasa, joǵarǵy salmaqqa ótetinin málimdedi.
«Gennadıı orta salmaqta barlyq belbeýlerdi jeńgennen keıin, sol dıvızıonda qalýdyń esh mánisi joq. Ulybrıtanıalyq boksshy Bıllı Djo Sonderspen jekpe-jek maýsymda ótetin bolsa, onda GGG ekinshi orta salmaqqa kóterilýdi josparlap otyr. Ary qaraı... «Kanelomen» kelisimshart jasalsa, onymen judyryqtasýǵa da daıynbyz. Eger ol kelispese, sýper orta dıvızıonǵa kóshetin bolamyz», - dep jazady Sanchestiń sózin BoxingNews24 portaly. Onyń aıtýynsha, sýper orta salmaqta olar «iri jigittermen sharshy alańǵa shyǵyp, iri jekpe-jekterge shyǵatynyn» aıtady. Ekinshi orta salmaqtaǵy jigitterdiń Golovkınniń soqqysyna qalaı tótep beretinin kóremiz. Hılberto Ramıres qazirdiń ózinde Golovkınmen judyryqtasqysy keletinin aıtty. Men Golovkınniń sýper orta salmaqta barlyq belbeýlerdi jeńip alǵanyn kórgim keledi», - dedi bapker.
Aıta keteıik, ınsaıderlik aqparat boıynsha, BAQ betterinde Golovkın - Sonders jekpe-jegi Astanada 17 maýsymda EXPO-2017 halyqaralyq kórmesi kúnderi ótetini habarlandy. Qazaqstandyq boksshy men meksıkalyq Saýl «Kanelo» Alvares arasyndaǵy jekpe-jek qyrkúıekte ótedi dep boljanady, alaıda kelissózder áli de júrip jatyr.
