UQK Akademıasynyń 24 jastaǵy eks-kýrsanty 14 jastaǵy oqýshymen jynystyq qatynasqa túsken degen kúdikke ilindi, - dep habarlaıdy Tengrinews.kz
Alaıda qyzdyń ata-anasy jigittiń bastapqyda zorlap, keıin bopsalaǵanyn málimdep otyr. Olardyń pikirinshe, Rýstam esimdi eks-kýrsant qyzben 2016 jyly áleýmettik jeli arqyly tanysqan. Anasynyń aıtýynsha, qyzy men eks-kýrsant Internette kóp ýaqyttan beri hat almasyp júrip, kúzde tuńǵysh kezdesken. Sóıtse, olar kórshi bolyp shyǵypty.
Anasy jigittiń kólikpen kelip, qyzdy salonǵa kirgizip alǵanyn aıtady. Olar sóıleskennen keıin tarap ketken. Al eki aptadan keıin, anasynyń aıtýynsha, jastar taǵy da kezdesipti.
Áıeldiń aıtýynsha, osy ekinshi kezdesýde jigit qyzǵa kólikpen serýendeýdi usynyp, adamdar az júretin jerge barǵan. Ol jaqta qyzdyń uıaly telefonyn tartyp alyp, zorlaǵan-mys. Keıin, oqýshy qyzdyń anasynyń aıtýynsha, jigit qyzǵa qaıtadan kelgen. "Ol vıdeotirkeý qurylǵysyna túsip qalǵan jazbany áleýmettik jelige salamyn dep qorqytyp, bopsalady", - dep málimdedi áıel.
Anasynyń aıtýynsha, qyzynyń bireýmen kezdesip júrgenin ol birneshe aı ótkennen keıin kezdeısoq bilip qalǵan: qyz sabaqtan qashyp ketip, muǵalimderi dabyl qaqqan.
"Kúıeýim mektepke dereý kelip, mán-jaıdy bile bastady. Joq. Barlyǵy ornynda. Sonda muǵalim barlyq qyzdy jınap alyp, ne biletinderin suraǵan. Sol kezde qyzdar Rýstam degen bireýdiń baryn, ony qyzdyń jigitim dep aıtatynyn habarlaǵan. Kúıeýim barlyq qyzǵa baqylaý jasap, qyzy jaıly bar málimetti berýin suraǵan", - deıdi qyzdyń anasy.
Sheshesi jigittiń qyz kámelet jasqa tolmaǵanyn bilgen deıdi. Ata-anasy polısıaǵa aryzdy 2017 jyldyń 31 qańtarynda túsirgen.
Al óz kezeginde Almaty oblystyq polısıasynyń ókilderi osy derekpen sotaldy tergeýlerdiń biryńǵaı reestrine 122-baptyń 1-shi bóligi ("On alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketter jasaý") boıynsha tirkelgenin habarlady. Alaıda qyzdyń ata-anasy tártip saqshylarynyń sotaldy tergeýdi basqa bappen tirkeýi kerek bolǵanyn aıtady.
"Sebebi bul kelisimmen jynystyq qatynasqa túsý degendi bildiredi. Bul eseptelmeı me sonda? Barlyǵy qujatta jazylǵan. Erkinen tys zorlaǵan, bastapqyda telefonyn tartyp alǵan, qyzym jylaǵan, kólikten shyqqysy kelgen, al ol kúshtep sheshindirgen. Urǵan joq, árıne, biraq ol shoshyp qalǵan", - deıdi qyzdyń sheshesi.
Al polısıadaǵylar qazirgi ýaqytta istiń İle aýdandyq prokýratýrasyna joldanǵanyn aıtty.
"Kúdiktige qatysty QR QPK-niń 156-babyna sáıkes "Sotqa deıingi tergep-tekserýdi júzege asyratyn adamǵa jáne sotqa kelý týraly mindetteme" bultartpaý sharasy tańdaldy", - dedi Almaty oblystyq İİD ókilderi.
Al QR UQK Akademıasyndaǵylar kýrsanttyń "shart talaptaryn oryndamaýyna baılanysty" 2017 jyldyń 30 qańtarynda oqýdan shyǵarylǵanyn habarlady. Oqý kezinde jigit jaǵymdy jaqtarymen kózge túsken deıdi akademıadaǵylar. Oqý ornyna kúdikti 2016 jyldyń shildesinde túsken.
