№1 «Sahnager» ulttyq teatr premıasy 200-den asa obrazdy somdaǵan Qazaqstannyń halyq ártisi Aısha Abdýllınaǵa tapsyryldy. «Teatr ónerin damytýǵa qosqan orasan zor eńbegi úshin» nomınasıasyndaǵy ulttyq syılyqty memlekettik hatshy Gúlshara Ábdiqalyqova tapsyrdy. Ótken jyly ómiriniń 80 jylyn teatrǵa arnaǵan halyq ártisi 100-jyldyq mereıtoıyn atap ótken bolatyn.
«Teatr ónerin damytýǵa qosqan orasan zor eńbegi úshin» nomınasıasyn alǵan Aısha Abdýllına kórermender men laýreattarǵa kóńil jastyǵyn tilep, jas ártisterge eńbek etýge, óz isine degen súıspenshilikke shaqyrdy.
Qazaqstannyń birtýar ártisi, Qazaqstan sahnasynyń «alǵashqy Dezdemonasy» Aısha Abdýllına 100 jasynda da óz kórermenderin qýantyp keledi, keremet án salyp, ázil-qaljyńdarymen súısintti.
Aısha Abdýllına túrli janrlarda júzden asa rólderdi oınap, jetistikterge jetti. 26 jasynda Qazaq SSR-niń eńbek sińirgen ártisi ataǵy berilse, 1958 jyly Qazaq SSR Halyq ártisi atandy.
Mektep bitirgennen keıin, aǵasy Pirmuhamed pıanıno men skrıpkaǵa baýlıdy. Aǵasy M.Áýezov atyndaǵy akademıalyq drama teatrǵa ertip ákeledi de, emtıhandy sátti tapsyrtyp, teatr janyndaǵy eki jyldyq stýdıaǵa oqýǵa túsiredi. Onyń emtıhan qabyldaýshylar - Mıhaıl Grıgorevıch Nasonov, teatr dırektory Bekov, Muhtar Áýezov, Elýbaı Ómizaqov tabıǵı darynyn birden baıqap, oqýǵa qabyldaıdy. Osynda Ámına Ómirzaqova, Hadısha Bókeeva, aǵaıyndy Abdýllındermen birge bilim alady. 1935-47 jyldary atalǵan teatrǵa aktrısa bolyp qabyldanady. Bul jerde «Eńlik-Kebekte» Eńlik, «Aqan seri-Aqtotyda» Márzıa, N. V. Gogoldiń «Revızorynda» Mará Antonovnanyń, Ý.Shekspırdiń «Otellosynda» Dezdemona obrazdaryn somdady. 1947 jyly M.Áýezov teatrynan Ońtústik Qazaqstan oblystyq J.Shanın atyndaǵy qazaq drama teatryna aýysyp. sahnada 200-den asa súbeli rolder somdady. K.Galdonı «Eki myrzaǵa bir qyzmetshi» - Bıatrıche, O.Balzak «Ógeı sheshe» - Gertrýda, A.Ostrovskıı «Jazyqsyz aıyptylar»- Golchıha, Shekspır «Romeo-Djýletta» - Ledı Kapýlettı, M.Áýezov «Qobylandy»- Qurtqa sekildi tarıhı tulǵalarmen qosa zamanaýı rolderimen kórermen jadynda saqtalyp qalǵan eren aktrısa. Sahna sańlaǵy, Qazaqstannyń halyq ártisi, «Qurmet belgisi», «Parasat» ordenderimen marapattalǵan.
Osy jyly Qazaqstanda Halyqaralyq teatr kúni teatr óneri salasyndaǵy eleýli oqıǵa – «Sahnager-2017» ulttyq teatr syılyǵyn tapsyrý saltanatymen erekshelendi. Qazaqstandyq «Sahnager-2017» ulttyq teatr syılyǵy «Samuryq-Qazyna» Ulttyq ál-aýqat qory» AQ qoldaýymen 2017 jyly Qazaqstan Teatrlary asosıasıasynyń bastamasymen taǵaıyndalyp otyr. Ulttyq syılyq teatr dástúrin saqtaý men nyǵaıtýǵa baǵyttalǵan.
