Elimizge belgili tilshi Azamat Keńesuly «Qazaq handyǵy» fılminde ShahBýdahtyń jesiri Aqqozyny somdaǵan jalpy jurtqa tanymal ánshi Kámshat Joldybaevaǵa qatysty synı pikir aıtyp, óz oıymen Facebook áleýmettik jelisindegi jeke paraqshasynda bildirdi. 

«Kóshpendiler» fılminiń búdjeti biraz qazynamyzdy opyryp ketip edi. Sol kezde opynyp ek. Búgin "Qazaq handyǵyn" kórip, azdap kúpti kóńil ornyna túskendeı boldy. Sol kezde salynǵan "maket qalashyq" kóp fılmge kómek boldy. Biraz qarjy únemdeldi. Biraq, biraǵy bar. Shoý bıznestiń shańyraǵynda júrgenderdiń tarıhı fılmderde oınaǵanyn tegi bir qabyldaı almaı-aq qoıdym. Kámshat Joldybaevadan basqa aktrısa tabylmady ma? 18 teatrdan Kámshattyń ornyna oınaıtyn bir kásibı aktrısa tabylmady ma eken? Jalpy fılmniń jaryqqa shyǵýy úlken tabys. Biraq, aqyry qyrýar aqsha jumsalǵasyn, kil myqty kınogerler júrgesin minsiz fılm shyǵýy tıis edi», - dep, óz pikirimen bólisti tilshi.

Azamat Keńesulynyń bul pikirin qoldaǵan oqyrman kóp boldy. Olar da túrlishe pikir qaldyryp, óz oılaryn jazyp qaldyrdy:

«Osyny men de aıtaıyn dep edim. Kınony kádimgideı uıyp kórip otyryp, Kámshat kımeshekpen jylap jatqan jerin kórgende eriksiz kúlip jiberip, kınoteatrdaǵy basqa kórermenderden qysylǵanym. Ras klıp pen tarıhı fılmde birge túsip júre berýge bolmaıdy ǵoı. Ekran betinen túspeıtin keıbir ózge akterler men ánshi-júrgizýshilerge de eskeretin dúnıe negizi. Mysaly Láıla Sultanqyzy degen kisiden kóz sharshady»

«Qazaqtyń turmysy men psıhologıasyn qazaqtan artyq eshkim túsinbeıdi. Ózge ulttardy tyqpalaı bergenshe, ózimiz sol deńgeıge kóterilýimiz qajet».