Sátti kadr úshin osyndaı qadamǵa barǵan turǵynǵa qatysty is Pavlodar qalalyq ákimshilik sotynda qarastyryldy.

İs materıaldaryna súıensek, 23 jastaǵy Bekzat Ashýov kóńil kóterip, polıseı kóliginiń fonynda selfı jasamaqshy bolypty. Jas jigit aldymen ÝAZ kóliginiń kapotyna, keıin tóbesine shyǵyp alǵan. Ol azdaı, shaǵymdanǵan turǵyndardy balaǵattaǵan. Sot otyrysynda aıyptalýshy kinásin tolyq moıyndap, osyndaı áreketke barýǵa «tentek sý» sebepker bolǵanyn jetkizdi.

Pavlodar oblystyq sotynyń baspasóz hatshysy Áıgerim Súleımenovanyń aıtýynsha, Bekzat Ashýov usaq buzaqylyq jasaǵany úshin sottaldy.

«Buzaqylyq jasap, turǵyndardy balaǵattaǵany úshin 23 jastaǵy azamatqa 10 kúnge qamaýǵa alý túrinde jaza taǵaıyndaldy. Aıta keterligi, buǵan deıin pavlodarlyq ákimshilik jaýapkershilikke tartylmaǵan», - dep habarlady Áıgerim Súleımenova.

Prokýror A. Mahvatovanyń qorytyndysyna súıensek, aıyptalýshyǵa qatysty jaza jeńildetilgen.

«Osyndaı sheshim qabyldaýǵa aıyptalýshynyń kinásin tolyq moıyndaǵany sep boldy. Bul sottyń oń sheshim qabyldaýyna áser etti», - deıdi prokýror.