Qazirgi tańda ózge ult ókilderiniń bir-birimen neke qurǵanyna tańyrqap qaramaımyz, ádettegi jaǵdaı sekildi bolyp ketken. Alaıda, bizdiń qarakózderimizdiń qytaılyq azamattarǵa turmysqa shyǵýy eldiń ashýyn keltirip, shamyna tıip jatyr. Qytaı azamatyna kúıeýge shyqqan Aıjan Raımbekova esimdi qazaq qyzy kópshiliktiń pikirimen kelispeı, qazirgi tańda óz jarymen baqytty ómir súrip jatqandyǵyn aıtady, dep habarlaıdy pandaland.kz, málimettiń qazaqsha nusqasyn «Qamshy» portaly oqyrman nazaryna usynady.

«Men Almaty qalasynda týǵanmyn. №73 orta mektepti bitirip, Ál-Farabı atyndaǵy QazUÝ-dyń shyǵystaný fakúltetinde oqydym.

2007 jyly eń alǵash ret shetelge shyǵyp, Pekın qalasyna bardym. Sol qaladan dál qazirgi jarymdy kezdestirdim. Ol Qytaıdaǵy stýdentter keńesiniń negizin qalaǵan adam boldy. Bastapqy kezde jáı dos bolyp júrdik, biz uıymdastyrǵan túrli is-sharalarǵa kelip turatyn. Pekın ýnıversıtetinde qazaq balarymen kóp dos bolǵandyqtan, bizdiń mádenıetimiz onyń janyna jaqyn boldy. Magıstratýrany támamdap, Pekın qalasyna jumys jasaýǵa kelgennen soń bir-birimizdi unata bastadyq», - deıdi óz jaıynda Aıjan Raımbekova.

Qyzynyń ózge ult ókilimen turmys qurýyna ata-anasy qalaı qarady?

«Basynda, árıne, qoryqtym, qobaljydym. Bir túsinbeıtinim, qazaqtar qanshalyqty qonaqjaı, ashyq-jarqyn halyq bolǵanymen, qytaılyqtardy sý qandary súımeıdi. Alaıda, meniń ata-anam jarymdy jyly júzben qabyl aldy. Jubaıym olardy adamgershiligimen, bizdiń mádenıetimiz ben dástúrimizge degen syılastyǵymen jáne de qarapaıymdylyǵymen baýrap aldy. Bizge kedergi bolǵan bir ǵana nárse – Qazaqstannyń búrokratıalyq apparaty. Jubaıymnyń vızasyn ýaıymdaımyn dep, birneshe tún uıyqtaı almaı júrdim», - dep málimdedi óziniń aralas nekesine qatysty ata-anasynyń kóz qarasyn.

«Qazirgi tańda eki balam bar: Arslan men Tamerlan. Ekeýi de Qazaqstan azamattyǵyn alyp, qujatta ulty qazaq dep jazylǵan. Jubaıym bul sheshimdi qup kórip, qoldaý bildirdi. Balalarym qytaı, orys jáne aǵylshyn tilderinde erkin sóıleı alady, al qazaq tiliniń ońaı sózderin túsinedi. Ózim bilimdi orys tilinde alǵan bolsam da, qazaq tilinde aýy eki sóıleýge shamam keledi», - dep óziniń balalary jaıly da áńgime qozǵap ótti Aıjan.

Aýdarǵan: Nazerke Labıhan