Májilistegi komýnıser fraksıasynyń depýtattary muǵalimderdiń taǵy da mindetine kirmeıtin jumystarǵa "jegilmek" ekenin aıtyp, Úkimet basshysyna depýtattyq saýal joldady, dep habarlaıdy Sputnik portaly.
"Bıylǵy jyly túlekterdiń qorytyndy attestasıasy jáne ulttyq biryńǵaı testileýdiń jańa formatyna sáıkes túlekter orta bilim jónindegi atestat alý úshin mektepterde emtıhan tapsyrady jáne joǵarǵy oqý ornyna túsip, grant alý múmkindigine ıe bolý úshin UBT tapsyrady. Qazirgi ýaqytta bilim jáne ǵylym mınıstrligi UBT tapsyrý sharalaryn uıymdastyrýǵa mektepterdi jaýapty etip bekitip jatyr. Onyń ishinde mektep túlekterin jınaý, kólikpen qamtamasyz etý, ortalyqtandyrylǵan tamaq uıymdastyrý, keıbir jaǵdaıda turatyn jer ázirleý sekildi jumystar bar. Bul rette atestat alǵan túlekter mekteptiń oqý prosesiniń qatysýshysy bolyp tabylmaıtynyn atap ótý kerek. UBT ótkizýdi uıymdastyrýǵa muǵalimderdi tartý mindetine kirmeıtin jumysty oryndaý ǵana emes, sonadaı-aq óz ókilettikterin asyra paıdalaný bolyp tabylady", — dedi búgin májilistiń jalpy otyrsynda Irına Smırnova. 
Onyń aıtýynsha, testileýdiń muǵalimderdiń demalysy kezinde ótetinin de umytpaý kerek. Bul degenimiz, muǵalimderdi eńbek demalysynan shaqyryp alady degen sóz. Budan bólek, UBT-ǵa qatysý ár túlektiń jeke quqyǵy bolyp tabylady. Eger ol ári qaraı joǵarǵy oqý ornyna túsýdi kózdemese, ony eshkim májbúrleı almaıdy. 

"Bilim jáne ǵylym mınıstrligi buqaralyq aqparat quraldarynda bir aqparat beredi de, al shyn máninde basqa jaǵdaıǵa tap bolamyz. Jaqynda ǵana mınıstrlik basshylyǵy resmı túrde muǵalimderdi mindetine kirmeıtin jumystardan bosatý qajettigin málimdegen edi. Endi sózden naqty iske kirisetin ýaqyt jetti. Sondaı-aq UBT qorytyndysy boıynsha taǵy da mektepterdiń reıtıńisi jasalady degen aqparat alańdaýshylyq týdyrady. Bul jaǵdaı mekteptiń maqsat-mindetterine sáıkes kelmeıdi dep sanaımyz", — dedi Smırnova. 

Osyǵan oraı, depýtattar, mektep muǵalimderin UBT ótkizýdi uıymdastyý mindetinen bosatýdy jáne reıtıń jasaý tájirıbesin doǵarýdy surady.