Astana Banki otandyq bank qyzmetteri naryǵy úshin biregeı bolyp tabylatyn «Qyzǵylt jaǵa» atty áleýmetke baǵdarlanǵan jobany daıyndap otyr. Bul jóninde Qazaqstanda áıelder kásipkerligin damytý jáne qoldaýǵa arnalǵan baspasóz májilisi kezinde Astana Banki basqarmasynyń tóraǵasy Eskendir Maılybaev málimdedi dep habarlaıdy qamshy.kz.

Osyǵan oraı is-sharaǵa «Áıelder kóshbasshylyǵy qory» QQ joba jónindegi dırektory Svetlana Bogatyreva, Ortalyq Azıadaǵy «BUU – Áıelder» qurylymynyń ókili Ileın M.Konkıevıch, Damý qory basqarmasy tóraǵasynyń orynbasary Nurlan Aqshanov qatysty.

«Áıelder kásipkerliginiń búkil mańyzdylyǵy men ózektiligin túsine otyryp, bizdiń naryqta teńdesi joq «Qyzǵylt jaǵa» atty jobamyzdyń iske qosylǵanyn qýanyshpen habarlaımyz. Osydan bir jyl buryn biz tamasha jaǵdaılardy usynatyn áıelderge arnalǵan tuńǵysh kartalardy iske qosqan bolatynbyz jáne de ol bizdiń klıentterimiz arasynda úlken suranysqa ıe boldy. Endi bıylǵy jyldyń sáýir aıynan bastap áıelderge tıesili kartalar arqyly taýarlar men qyzmetter qolma-qol aqshasyz tólengen jaǵdaıda bank áıelder arasyndaǵy kásipkerlikti damytý jáne qoldaý úshin klıenttiń jumsaǵan somasynyń 0,7 paıyzyn Áıelder kóshbasshylyǵy qoryna aýdaryp otyratyn bolady. Bul somany bank tolyǵymen óz qarjysy esebinen tólemek. Nátıjesinde klıent tólem jasaý arqyly áıelder bıznesin damytýǵa óz úlesin qosady, sondaı-aq, oǵan ádetki mólsherde keshbek somasy qaıtarylady. Qorǵa kómek kórsetý úshin eń bastysy tólem áıelderge tıesili kartadan jasalý kerektigin eskerý qajet. Osylaısha ıgi iske klıent te, bank te atsalyspaq», - dep atap ótti Maılybaev myrza.

Sondaı-aq, qosymsha habarlanyp otyrǵandaı, áıelderge bıznes júrgizýge qatysty paıdaly aqparatty usyný úshin sáýirdiń birinshi kúni www.pinkproject.kz atty biregeı veb-alań iske qosylmaq. Saıtta áıelder kásipkerligin qarjylandyrý baǵdarlamalaryna qatysty búkil aqparat qamtylatyn bolady. Sondaı-aq, osynda áıelderge arnalǵan súıikti saıttardy toptastyryp, jańalyqtardy qadaǵalaýǵa múmkindik beretin jańalyqtar agregatory da qyzmet jasamaq. Kásipker áıelder jeke blogtaryn júrgizip, tájirıbesimen, ıdeıalarymen bólisýge, seriktesterdi taýyp, qajetti baılanystardy ornatýǵa múmkindik alatyn bolady. Sonymen qatar, saıt arqyly qarjylyq jáne zańgerlik máselelerge qatysty keńes alýǵa da bolady. Jeke kásipkerlikti, jaýapkershiligi shekteýli seriktestikti nemese bankte shotty qalaı ashýǵa bolady? Elektrondyq sandyq qoltańbany qalaı alýǵa bolady nemese salyq salý úlgisi qalaı toltyrylady? Osy jáne basqa da kóptegen saýaldardy onlaın-menedjerlerden surap bilýge bolady.

Áıelder kóshbasshylyǵy qorynyń joba jónindegi dırektory Svetlana Bogatyreva kásipker áıelderdi oqytýǵa analǵan áleýmettik jobaǵa qoldaý kórsetip otyrǵany úshin Astana Bankine zor alǵysyn bildirdi. «Osy jobanyń arqasynda Qazaqstannyń Almaty, Astana, Qaraǵandy, Oral jáne Shymkent sekildi 5 qalasynda oqytý konfernsıalary ótkizilmek.  Biz Almaty qalasynda 3 jyl ishinde jınaqtalǵan tájirıbe negizinde ıgerilip, kásipker áıelderdiń qajettilikteri men úmitterin zertteýge negizdelgen tásildemeni qoldanbaqpyz. Osy format aıasynda kásibı spıkerler jáne kásipker áıelder bizdiń elimizde jınaqtaǵan tájirıbesimen bólisip, bir-birin oqytatyn bolady. Bul tásildeme óziniń nátıjeligin kórsetti, al endi Astana Bankiniń qoldaýy arqasynda Qazaqstan óńirlerindegi áıelder de kásipkerler qaýymdastyǵyna qosylyp, áıelder bıznesi úshin asa mańyzdy ári ózekti aqparattar men bilimderdi alýǵa múmkindigi bar», - dedi Bogatyreva hanym.

Osyǵan deıin bizdiń elimizde «áıelder kásipkerligi» degen uǵymnyń ózine kúmánmen qaraıtyn, al búginde áıelderdiń iskerlik keńesteri qurylyp, áıelder tobyna arnalǵan arnaıy bank ónimderi men baǵdarlamalary paıda bolýda. Osy tustasta áıelderdiń kásipkerligin qoldaıtyn quraldardy daıyndaý kezinde áıelderdiń barlyq qajettilikteri men olardyń júrgizetin bıznesiniń erekshelikterin eskeretin genderlik tásildeme tolyǵymen qoldanylmaı keledi. Shyntýaıtynda, áıelder kásipkerligi – Qazaqstannyń ekonomıkalyq ósýi úshin orasan zor áleýetke ıe sala. Ótken jyly búkil álemde áıelder arasyndaǵy kásipkerliktiń qarqyndy túrde óskeni atap ótilgen bolatyn. Dál osyndaı betalys Qazaqstanda da baıqalyp otyr. Qazaqstan Respýblıkasy Ulttyq ekonomıka mınıstrliginiń málimetteri boıynsha áıelderdiń basqarýyndaǵy orta jáne shaǵyn kásipkerlik sany 2016 jyldyń 1 qańtarynda 647,082 adamdy quraǵan, al jalpy elimiz boıynsha 1,530,258 shaǵyn jáne orta bıznes sýbektisi qyzmet etedi.  Álemniń 20 elinde ótkizilgen 87 zertteý nátıjelerine sáıkes áıelder basqaratyn kásiporyndar eń tabysty bolatyny anyqtalǵan. Zertteýshiler bıznespen aınalysatyn áıelder qolastyndaǵy qyzmetkerleri, qoǵam jáne qorshaǵan ortanyń qamyn kóbirek oılaıtynyn moıyndaýda.

«Áıelder kóshbasshylyǵy qorymen birge osy jobany júzege asyrý kezinde biz megapolısterdegi áıelderdi ǵana emes, sondaı-aq, elimizdiń óńirlerindegi isker hanymdardy barynsha qamtyp, osy iske tartýdy kózdedik. 5 qalada konferensıalardy ótkizý arqyly biz búkil Qazaqstannan eń kem degende 500 áıeldi oqytýdy josparlap otyrmyz. Osy jobany júzege asyrý elimizde áıelder arasyndaǵy kásipkerliktiń damýyna jańa qozǵaý salatynyna senimdimiz», - dep sózin qorytyndylady Maılybaev myrza.