Astanada Alash qaıratkerleriniń urpaqtary qatysýymen ótken ǵylymı konferensıada qoǵam qaıratkeri, saıasattanýshy Berik Ábdiǵalıuly «ǵalymdar   men qoǵam qaıratkeri Alashordanyń 100 jyldyǵyn keń kólemde atap ótýge úlesterin qosýy tıis» ekendigin aıtty.

Bıyl Alash qozǵalysynyń ǵasyrlyq toıy - Alash ulttyq avtonomıasynyń, Alash partıasynyń jáne Alash úkimetiniń qurylǵanyna 100 jyl tolyp otyr. «Shyn máninde Úkimet tarapynan Alashordanyń 100 jyldyǵyna arnalǵan sharalarymen qatar, ózimiz árbir azamat pen ǵalym, qoǵam qaıratkeri «men ne isteı alamyn?» degen oıda bolýy tıis dep sanaımyn. Bul ataýly datany keń kólemde atap ótpeý úlken qıanat. Sondyqtan ǵalymdar, zıaly qaýym ókilderi óz úlesterin birigip qossa degen tilek bar»,-dep toqtaldy Berik Ábdiǵalıuly.

Osy oraıda ol búginge deıin Alash qozǵalysyna qatysty kóptegen eńbekter jarıalanǵanyn aıta kele: «Aldaǵy ýaqytta áli de shyǵatyny anyq. Biraq sonymen qatar zerttelmegen taqyryptar da barshylyq. Atap aıtqanda, belgisiz taqyryptardyń biri Alash áskerine qatysty edi. Shyn máninde Alash áskeriniń orny erekshe dep esepteımiz. Úsh jyldan beri Reseı arhıvterinde jumys istep, bıyl kúzge qaraı kitabym shyǵady dep josparlap otyrmyn»,-dedi.

B.Ábdiǵalıulynyń paıymynsha, armanda ketken babalarymyzdyń esimin jańǵyrtý, erlikterin kórsetý búgingi urpaqtyń úlken mindeti bolýy tıis. Budan buryn habarlaǵanymyzdaı, aǵymdaǵy jyldyń basynda Alashorda qozǵalysynyń qurylǵanyna 100 jyl tolýyna oraı Alash zıalylarynyń shyǵarmashylyq muralaryn zerdeleý jáne ony jandandyrý máseleleri boıynsha Tasmaǵambetovtiń bastamasymen Úkimette keńes ótip, Úkimet Alashordanyń 100 jyldyǵyn keń kólemde atap ótýge ázirlene bastaǵan edi. Bul rette, Alash qozǵalysynyń táýelsizdik murattary úshin kúrestegi róli men mańyzyn, onyń kóshbasshylarynyń saıası-quqyqtyq, ulttyq qundylyqtarǵa qatysty kózqarastaryn, tujyrymdaryn jańa zamannyń talaptaryna saı zerdeleý eskerilgen bolatyn.