19 jastaǵy nıgerıalyq Rama Harýn óte sırek kezdesetin jáne aýyr dertpen dúnıege kelgen. Dárigerler qyz týylǵan kezinde-aq oǵan aǵzasy ósip-jetilmeıdi degen dıagnoz qoıǵan. Qazirgi tańda qyz 6 aılyq bala sekildi, aıaq-qoldary múldem jumys istemeıdi. Únemi denesinen aýyrtpalyq sezinetin qyz búkil ómirin plasıkalyq ydysta ótkizýde, tipti, múgedekterge arnalǵan arbanyń ózi oǵan qolaısyz, dep habarlaıdy «Qamshy» aqparattyq agenttigi sheteldik BAQ-qa silteme jasap.

«6 aılyǵyna deıin qyzym sap-saý bolatyn. Alaıda, eńbekteýdi sol boıy úırenbedi, keıinnen qyzymnyń ósý prosesi toqtap qaldy. Onyń ómiriniń mánin keltirýge barynsha tyrysamyz, qasynda únemi bir adam otyrýy qajet. Rama kúnige tańerteń oıanǵan kezinde bir tańǵajaıyptyń bolatynyna senedi», - deıdi qyzdyń anasy.

Ramaǵa týǵan inisi 10 jastaǵy Fahad óte jaqyn, ápkesin qatty jaqsy kóredi. Oǵan qaty jany ashıdy, degenmen Fahad Ramany erekshe adam dep esepteıdi.

«Men oǵan únemi kómektesip júremin jáne de biz kúnige qydyramyz. Basqa adamdar meniń ápkeme kómek kórsetken kezinde men qatty qýanamyn. Rama týystarymyzǵa qonaqqa barǵandy unatady, sondyqtan da biz olarǵa jıi baryp turamyz», - deıdi balaqaı.

Bul qyzdyń dertin anyqtaý áli kúnge deıin múmkin bolmaı keledi. Ata-anasy 15 jyl boıy aýyr dertke shaldyqqan qyzdarynyń naqty nemen aýyratynyn anyqtap bilmek boldy, alaıda esh nátıje shyqpady. Rama Harýnnyń jaǵdaıy nıgerıalyq dárigerlerdi tyǵyryqqa tiredi. Keıbir jergilikti dárigerler oǵan jynnyń qarǵysy tıgen dep aıtady.

Ramaǵa kóp adamdar kómektesýge kelip turady eken.

«Bir kúni qyzymmen birge dúkenge aralaýǵa barǵanymda Ramaǵa múgedekter arbasyn alyp bergen adamdy kezdestirip qaldym. Ol kisi birneshe ret sýretke túsirip, jergilikti gazetterge berdi. Sol sátten bastap kómek qolyn sozýshy adamdar kóp kelip turady», - deıdi anasy. Qazirgi tańda Ramanyń týystary qaıyrymdylyq qorlary men halyqaralyq deńgeıdegi dárigerlerdiń nazaryn aýdarǵysy keledi.

Ramanyń sońǵy úmiti – tańǵajaıyp qubylystyń oryn alýy.

Batyl qyz bir kúni baǵy janatynyna senimdi: «Meniń ómirimde bolyp jatqan túrli jaǵdaılar úshin Qudaıǵa rızashylyǵymdy bildiremin. Keıin ózimniń kókenis satatyn dúkenimdi ashqym keledi jáne muqtaj adamdar kelip sol dúkennen bar kerekterin alsa eken deımin. Ómirden dál osyny qalaımyn», - deıdi Rama.