Osyǵan deıin QR halyq ártisi Roza Rymbaeva «Dımashtyń elimizde súıikti ánshi atanýyna múmkindigi az» degen pikir aıtqan bolatyn. Al elimizdegi eń tanymal, jastardyń súıikti ánshisi Qaırat Nurtas «Dımash óz ánin tappaǵandyqtan elde baǵalanbady» degen oıyn bildirgen. Sodan soń qazaq estradasynyń jarqyn juldyzdarynyń aıtqany áleýmettik jelide qyzý talqyǵa túsken bolatyn. Alaıda QR Ulttyq óner ýnıversıtetiniń oqytýshysy Maıra İlıasqyzy bul pikirlermen kelispeıtindigin jetkizdi. Onyń pikirinshe, Dımash Qudaıbergenovtiń óneri elimizde de joǵary baǵalanatyn bolady.

«Joq, ol pikirge qarsymyn. Rozanyń da, Qaırattyń da janashyrlyq bildirip jatqany óte durys. Qazirgi tańda bizdiń Elbasy Nursultan Nazarbaev «Balaǵa qarańdar» dep QR Ulttyq óner ýnıversıtetiniń rektory Aıman Musaqojaevaǵa, ári QR Mádenıet jáne sport mınıstri Arystanbek Muhamedıulyna arnaıy tapsyrma bergen bolatyn. Olar balany qamqorlyǵyna alyp otyr. Meniń oıymsha, osy jaǵdaıdy eskere kele, mundaı jaǵdaı bolmaıdy. Dúnıejúzi ony moıyndap, úlken mýzyka mamandary óz baǵalaryn berip jatqan kezde bizdiń Dımashtyń óneri elimizde baǵalanady», - dedi ol.

Osy oraıda tanymal ánshi Dımashtyń talanty burynnan elimizde joǵary baǵalanǵanyn atap ótti.

«Halyq burynnan da baǵasyn berip júr. Onyń osy bilim ordasyna túskeniniń ózi eńbeginiń joǵary baǵalanǵany. Sondaı-aq, elimizdegi úlken shoý baǵdarlamalarǵa bizdiń Dımash qatysyp jatady. Tipti, ol memlekettik dárejedegi mańyzdy konsertterde, Elbasynyń aldynda ánderin aıtyp júr. Árıne, Dımash osydan 1-2 jyl buryn jas boldy. Qazir ol tájirıbe jınaqtap jatyr. Ol Qytaı Halyq Respýblıkasyndaǵy tamasha baǵdarlamaǵa qatysyp, «Azıanyń eń úzdik ánshisi» atandy. Osynyń barlyǵy onyń eńbeginiń baǵalanýy», - dedi ánshi.

Sonymen qatar Maıra İlıasqyzy Qytaıdy moıyndatqan qazaq balasynyń óz jerinde nege tanymal bola almaǵandyǵyn bylaısha túsindirdi.

«Másele memlekette emes. Máselen jarnamada. Bizde tyrnaq astynan kir izdep, osyndaı áńgime aıtyp júrgender bar. Belgili óner qaıratkerleriniń jáne azamattardyń aıtqan pikirin estidim. Ol durys emes. Bul jerde úlken ról oınaǵany jarnamanyń keremettigi. Esimde Maıkl Djekson qaıtys bolǵan kezde jarty saǵattyń ishinde dúnıejúzi onyń ómirden ozǵandyǵyn bildi. Sondyqtan munyń barlyǵy jarnamaǵa baılanysty. Qazaq eli ómir boıy ónerin syılaǵan», - dedi ol.

Sóz sońynda halyq ártisi kezinde otandyq prodúserlerdiń Dımash Qudaıbergenovti synǵa alǵanyndyǵyna qatysty oıyn bildirdi.

«Joq, men ony mensibegen dep aıta almaımyn. Men ony estip júrmin. Ol jerde bizdiń Dımash óziniń qazirgi deńgeıine jetpeýi, ol kezdegi tájirıbesiniń azdyǵy, jastyǵy áser etti. Meniń oıymsha aıtysker aıtyskerdi, jýrnalıs jýrnalısi, ánshi ánshini baǵalaýy kerek», - dep túıindedi sózin Maıra İlıasqyzy.

Esterińizge sala keteıik, 15 sáýirde Dımash Qudaıbergenov «I’m singer» halyqaralyq án baıqaýynyń eń sońǵy sheshýshi saıysyna qatysady.

Aqtyq saıysty «Hunan TV» jáne «Habar» telearnalary tikeleı efırden kórsetedi.