Qyzylorda oblysy Jańaqorǵan aýdanyndaǵy Qyrkeńse aýlynda turatyn Ábsattar Myrzabekovtiń úsh áıeli bar. Úsh áıel de baqytty ekenderin, kúıeýleriniń ózderin alalamaıtyndyǵyn aıtady, dep habarlaıdy "Qamshy" aqparattyq agenttigi Azattyq radıosyna silteme jasap.
58 jastaǵy Ábsattar Myrzabekovtiń birinshi áıeli Shynar Óteeva kúıeýiniń ekinshi, úshinshi áıel alýyn ózi qolqalap, ruqsatyn bergen eken. Shynar Óteeva bundaı qadamǵa kólik apatyna túsip, balasy shetinep ketkennen keıin barǵanyn aıtty. Óıtkeni sol apattan keıin bala kótere almaıtyn bolyp qalypty. Al ajyrasýǵa ata-enesi de, kúıeýi de qarsy bolǵan.
«APA», «DÁÝ MAMA» JÁNE «MAMA»
– Úsheýmizdiń ara-qatynasymyz jaqsy. Ekinshi áıeli Fatımadan eki qyz bar. Úshinshi áıeli Kúláıhannan – tórt qyz. Qyzdar eseıip, oqýǵa túsken soń ekinshi áıeli Fatımany bir úı qylyp qoıdym. Olar Shymkentte turady.
Biraq jazda bárimiz birge turamyz, – dedi.
Shynar Óteeva kúıeýiniń úshinshi áıeldi alýǵa da uldy bolý armany sebep bolǵanyn aıtady.
– Al úshinshi áıeldi kúıeýim uldy bolsyn dep alyp bergenmin. Aralasyp júrgen kisilerge qolqa salyp, «bir qyzyńyzdy bermeısiz be?» dep aıta beretinmin. Áke-sheshesi «alam deseń, al bir qyzymdy» dep ruqsat berdi. Eger er adamdardyń jaǵdaıy kelip jatsa, kóp áıel alýdyń artyqtyǵy joq sekildi. Bir jaqqa jol júrip ketkende, aýyryp qalǵanda úıde adam bolady. Ýaıymdamaısyń. Ótkende bes aı tósek tartyp jatyp qalǵanda, ekeýi asty-ústime túsip baqty. Balalarymyz meni «apa» deıdi, ekinshisi Fatımany «dáý mama», al kishisi Kúláıhandy «mama» deıdi. Ózimizdi baqytty sanaımyz. Men áıelden de, baladan da zıan kórip jatqan joqpyn, – deıdi Shynar Óteeva.
Sonymen qatar bir shańyraq astynda úsh áıeldiń urys-kerissiz, tatý-tátti turýy úshin, Shynar Óteevanyń aıtýynsha, er adam materıaldyq jaǵdaıynyń jaqsy bolýymen qatar áıelder arasyndaǵy artyq áńgimeni tyńdamaýy shart.
Ekinshi áıeli Fatıma Bórbekova da eki áıel alýdy qoldaıtyn aıtady. Onyń aıtýynsha, kúıeýińniń materıaldyq jaǵdaıy durys bolsa, áıelderin bir-birinen bóle qaramasa, ekinshi áıeli bolyp turýǵa bolady.
– Men Jetisaıda turǵanmyn. Sonda tanysyp, úılengennen keıin bir jyl sonda turdyq. Ol maǵan bala keregin aıtty. Men kelistim. Balaly bolǵannan keıin Jańaqorǵanǵa kóship bardyq. Men Jetisaıda tura beretin shyǵarmyn dep oılaǵanmyn, biraq kúıeýime eki jaqta júrý qıyn boldy. Balalarymnyń da, meniń de jaǵdaıymdy jasap otyr, – deıdi.
«ÓMİRDE MUNDAI ADAM JOQ»
Ábsattar Myrzabekov qazir birinshi áıeli Shynar jáne úshinshi áıeli Kúláıhanmen bir shańyraq astynda turady. Úshinshi áıeli Kúláıhan Qunaeva kúıeýinen 26 jas kishi. 21 jasynda kelgen Kúláıhan kúıeýiniń jasyna qaramastan jaqsy kórgennen keıin kelisimin bergenin aıtady. Onyń aıtýynsha, ózin qalyń malyn tólep alǵan.
– Barlyǵy bala úshin kelisimin berdi ǵoı. Bárimiz bir úıde turamyz. Quda túsip kelgende de bárin bildim, sosyn kelisimimdi berdim. Kelisim berý qıyn bolǵan joq. Shynar enem sıaqty. Materıaldyq jaǵdaımyz birdeı, ol jaǵynan eshkimdi bólmeıdi. Men kúıeýge 2000 jyldyń aıaǵynda shyqqanmyn.
Ol kezde qalyń maldyń kólemi 60 myń teńge jáne 9 qara mal apardy. Aldymen kúıeýim usynys jasady. Kúıeýimniń týysqandary qarsy bolǵan joq dep oılaımyn. Alaıda meniń týysqandarymnyń ishinde urysqandary boldy. Ózim unattym jas aıyrmashylyǵyna qaramastan. Al aǵaıyndar «qyzdyń ózi unatyp tursa, qarsylyǵymyz joq» dedi. Bul kisiniń qandaı ekenin bári jaqsy biletin. Ómirde mundaı adam joq dep oılaımyn, – dedi Kúláıhan Qunaeva Azattyq tilshisine.
Kúláıhan kúıeýi tórtinshi áıel alýǵa nıet tanytsa, qarsy bolmaıtynyn aıtty.
SHARIǴAT PEN ZAŃ
Qazaqstan musylmandary dinı basqarmasynyń baspasóz hatshysy Ońǵar qajy Ómirbek er adamǵa sharıǵat boıynsha tórt áıel alýǵa ruqsat ekenin aıtady.
– Onyń sharttary kóp. Tórt áıel alatyn adamnyń materıaldyń jaǵdaıy da, jeke basynyń kúsh qýaty da kelýi kerek. Barlyq áıeline birdeı ádiletti bolýy shart. Ekinshi áıel alamyn dep otbasynyń berekesin ketirýge bolmaıdy. Barlyǵy áıelderiniń kelisimimen bolýy shart. Alaıda Qazaqstanda eki nemese odan da kóp áıel alyp nekesin sharıǵat jolymen qıdyratyndar saýsaqpen sanarlyq, – dedi.
Almaty qalasy Jetisý aýdandyq azamattyq hal aktilerin jazý (AHAJ) bóliminiń bastyǵy Janna Halyqova zań boıynsha kóp áıel alýǵa tyıym salynǵanyn aıtty.
– Biz quqyqtyń memleket bolǵandyqtan zań boıynsha eki, úsh áıel alýǵa tyıym salynǵan. Eger ekinshi ret azamat nekege turǵysy kelip aryz berse, onda tek birinshi áıelimen ajyrasyp baryp qana aryz bere alady. Al basqa áıelden balasy bolsa, tek balanyń atyna ákelikti anyqtaý týraly aryz toltyrady. Ol tek balany ǵana moıyndaıdy, – deıdi AHAJ bastyǵy.
Pikir qaldyrý