Munaıly aýdanynyń turǵyny týǵan ulyn alaıaq kelinshektiń aldap ustap otyrǵanyn aıtýda. 9 sáýir kúni úıinen shyǵyp ketken uly búginge deıin ata-anasymen baılanyspaı otyr, dep jazady "Qamshy" aqparattyq agenttigi Nur.kz portalyna silteme jasap.

"Meniń balam bir aı buryn úılengen kelinshegin tastap, Larısa degen qyzdyń sońynan ketti. Qazirgi ákelgen kelinshegimen burynnan tanys bolatyn. Ol qyzynyń mektep bitirgenin kútip júrgende, myna Larısa degen alaıaqqa tap boldy. Osy qyzǵa úılenemin dep, shańyraqqa alyp keldi.  Balam ákelgen soń betashar jasaýǵa qamdana bastyq. Sol kúni bul kelinimniń alaıaq ekenin aıtyp, burynǵy kúıeýi habarlasty. Balama deıin sol jigittiń jary bolǵan, eki jarym jasar qyzy bar eken. Sol úıge kelin bolyp túsip, toıyn jasatyp, úsh aıdan soń úıdegi barlyq altyndaryn alyp qashyp ketken. Ol jigittiń anasymen áli kúnge deıin sóılesip turamyn. Ózi on alty jasynda bosanǵan eken",- deıdi Erlannyń anasy Janar Soltanova.

9 sáýirden bastap balasynan esh habar ala almaı otyrǵan ananyń aıtýynsha, Larısa ulyn qara sıqyrmen aınaldyryp, ustap otyrǵan kórinedi. Sebebi Erlan naýryz aıynda ǵana tarazdyq qyzben otbasyn qurǵan.

"Ulym naýryzda qazirgi kelinimdi alyp qashyp kelgen. Betasharyn jasap, úlken toıǵa daıyndalyp jatqanbyz. Mine, bir aptadan beri balam bizben sóılespedi, jas kelinime obal. Larısa kúnde aýzyna kelgendi aıtyp, kelinime neshe túrli sms jazady. Men kelinim sýısıd jasaı ma dep qorqamyn. AİİB-ge ótinish aryz jazyp, izdestirý de jarıaladym. Ázirshe, esh nátıje joq", - deıdi Janar.

Janar Jumaıqyzy Larısadan eshteńe qajet emes ekenin, tek týǵan ulymen tildesip, onyń ne sebepti bulaı jasap júrgenin bilgisi keletinin aıtady.

"Maǵan balamdy taýyp berse boldy, ol áıelden maǵan eshteńe kerek joq. Ne sebepti ulymnyń osylaı istep júrgenin bilsem deımir. Jas kelinniń ne kinási bar?! Maǵan, meniń úlken ulyma, Erlannyń áıeline neshe túrli hat jazatyny azdaı, Larısa kelinimniń ápkelerine túrli sms jazyp, daý shyǵarýda.

Ol meniń ulymdy oqytyp alǵan, týǵan ulymdy tanı almaı júrmin, zombı sıaqty. Olar qashyp júrmese, balam nege aldyma kelmeıdi?  Biz onyń qaıda turyp jatqanyn bilmeımiz, izdemegen jerimiz joq. Kelinim etegi jasqa tolyp, kúıeýin úıde kútip otyr. Men qazaqsha emshilerge barsam, balańyzdy oqytyp alǵan, ony biz qaıtara almaımyz deıdi. Larısa maǵan habarlasyp: "Balańyzdy kórsetpeımin, ne isteısińder?" dep ashyq aıtady, -dep muńyn shaqty Erlannyń anasy.

"Bizdiń Erlanmen úılengenimizge bir jarym jyldaı boldy. Meniń Erlannan bir qyzym bar. Ol bir jaǵdaılarmen Tarazǵa ketti. Sosyn áke-sheshesi artynan baryp, maǵan úılendirmeý úshin basqa qyzdy alyp berdi. Erlan ony súımeıtindigin aıtyp, balam men áıelime baramyn dep maǵan qaıtyp kelgen. Men ony kúshtep ustamaımyn, ol kúni keshe ǵana anasymen sóılesti. Ol qazirgi kelinshegin úıine qaıtaryńyz degen, biraq anasy kóner emes, -deıdi Larısa.

Ol buǵan deıin bir ret turmysta bolǵanyn jasyrmady. Birinshi nekesinen tapqan balasy anasynyń qolynda ekenin de aıtty. Al sıqyrlap aldy degen pikirmen Larısa múldem kelismeıtindigin málimdedi.

"Oqytyp aldy degen qazirgi zamanda ertegi sıaqty, ózderi tym yrymshyl bolǵan soń, senetin bolar. Áıtpese, úp-úlken jigitke men qalaı otyr-tur dep aıtamyn",- dep jaýap berdi Larısa.

Úı-ishimen baılanysqa shyqpaı júrgen Erlanmen Larısanyń telefony arqyly tildesip kórip edi.  Erlannyń aıtýynsha, ol eshkimnen qashyp júrgen joq. Al qazirgi kelinshegin áke-sheshesiniń ótinýi boıynsha ǵana alǵan.

"Men jıyrma eki jastaǵy jigitpin ǵoı, meni qalaı kúshtep ustaıdy?! Men olardy tyńdamaımyn, soǵan ashýlanyp otyrǵan bolar. Jaqynda úılengenim ras, bizde áli úlken toı bolmady. Ol biraq qazir óz úıine ketip qaldy", -dedi uıqyly-oıaý jaýap bergen Erlan Ońalbaı.

Aıta ketetini, Erlan Ońalbaıdyń anasy Janar Jumaıqyzy jas kelininiń úıde ekenin aıtyp, tipti telefon tutqasyn da bergen. Biraq, kúıeýinen tirideı aıyrylyp, qaıǵydan qan jutyp otyrǵan kelinshek Larısanyń aralaryna túskenine tórt jyldan asyp ketkenin ǵana aıtty.

Munaıly aýdanynyń AİİB qyzmetkerleri bul iske qatysty jaýap berýden bas tartyp otyr.