T.Júrgenov atyndaǵy Qazaq ulttyq óner akademıasynyń "Dástúrli mýzykalyq óner" kafedrasy el mádenıetine súbeli olja qosty. Halyq kompozıtorlarynyń ánderi notoǵa túsirilip, kitapqa engizildi.
Óner akademıasynyń oqytýshysy, mýzyka zertteýshisi, ánshi Sh.Darjanova Jetisý ánshilik mektebiniń negizin qalaǵan halyq kompozıtorlarynyń ánderiniń mátindik nusqasyn júıelep, notasyn dombyra aspabyna laıyqtap túsiripti.
Án jınaq kásibı ánshiler úshin de, jyrshy, termeshilerge de, mýzyka zertteýshilerine de, joǵarǵy oqý orny men arnaıy mýzykalyq mektepte oqıtyn jas ónerpazdarǵa da taptyrmas oqý quraly bolady endi.
Jetisýdyń jyrshylyq, ánshilik mektebi degende Qaban jyraý, Súıinbaı, Jambyl, Qulmambet, Baqtybaı, Sarybas, Barmaq, Kenen, Úmbetáli, Qalqa, Dánesh sıaqty óner sańlaqtarynyń óshpes óner týyndylary eske túsedi. Bul tolqynnan keıingi shoǵyr, ótken ǵasyrdyń otyzynshy jyldaryndaǵy náýbet pen zobalańda asyra silteýdiń, qýǵyndaýdyń qurbany bolǵan arystar, "halyq jaýy" atanǵan Sádiqoja, Pishán, Kódek, Qapez, Ryskeldiler de qapıada qaza tapsa da, artyna mol mura qaldyryp ketti.
Halyq kompozıtorlary atanǵan eldiń súıikti ánshi, jyrshylarynyń artyndaǵy mol murasy tolyqtaı zerttelip, hattalyp, bir izge túsirilip bitken joq. Zertteıtin, zerdeleıtin jumys áli de kóp.
Alasapyran zamanda qýǵynǵa túsip, atylyp, ıtjekkenge aıdalǵan arystardyń el ishinde, halyq arasynda jatqan týyndylary áli de bar. Tek ynta tanytyp, indete izdeıtin zertteýshisi bolsa, qazaqtyń án ónerine áli de mol olja qosylary anyq.
Basqany aıtpaǵannyń ózinde eki ǵasyrdyń kýási bolǵan toqsan jastan asyp ómirden ótken Kenen Ázirbaıulynyń murasy tolyqqandy zerttelip, zerdelengen joq. Maqala, esse, estelikter jazyldy, jazylyp ta jatyr, Aıgúl Jaqsylyqqyzy dısertasıaslyq jumys jazdy. Biraq bul Kenen Ázirbaıulynyń murasy tolyq zerttelip bitti degenge jaýap emes.
Osy olqylyqtyń orny az da bolsa bútindelip, "Alataý áýenderi" degen atpen shyqqan kitapqa Kenen Ázirbaıulynyń «Anam-aı», «Kóktem merekesi», «Jeńis toıy», «Ótedi-aý ómir» sekildi buryn eshqandaı án jınaqqa notasymen engizilmegen ánderi jarıalanypty. Kitapqa Úmbetáli Káribaıulynyń "Arpa-bıdaı", Pishán Jálmendeulynyń "Dúnıe, shirkin" sekildi buryn notaǵa túspegen týyndylary engizilipti. Qapez Baıǵabylulynyń da aıtylmaı kelgen ánderi notaǵa túsirilip, kópshilikke usynyldy.
"Saıasynda almanyń" dep atalatyn kitapqa Qazaqstannyń Halyq artısi, ánshi, kompozıtor Dánesh Raqyshevtiń oryndaýyndaǵy ánder toptastyrylǵan. Án jınaqty Dáneshtiń tól shákirtteriniń biri, dáneshtanýshy ánshi, ustaz Nurjan Janpeıis pen mýzyka zertteýshisi Murat Ábýǵazy qurastyrypty.
Dánesh Raqyshevtiń repertýarynda halyq ánderi, halyq kompozıtorlarynyń týyndylarynan bólek, óziniń tól ánderi de bolǵan. Óner zertteýshileri, T.Júrgenov atyndaǵy óner akademıasynyń "Dástúrli mýzykalyq óner" kafedrasynyń dosentteri Dáneshtiń óziniń ánderin de notaǵa túsirip, jınaqqa engizipti.
Qazaq mádenıeti men rýhanıatyna qosylǵan qos kitaptyń jaryq kórýine "Kenen Ázirbaıuly atyndaǵy qordyń" tóraǵasy, belgili kásipkeri Muhıt Ázirbaev demeýshilik jasapty. Atymtaı-jomart azamattyń demeýshiligimen jaryq kórgen kitaptyń júlgesi úzilmeı, keleshekte de jalǵasyn tabaryna kópshilik senimdi.
Eki kitaptyń tusaýkeseri Jambyl atyndaǵy fılarmonıada ótti. T.Júrgenov atyndaǵy óner akademıasynyń rektory Bıbigúl Núsipjanova men Kenen Ázirbaıulynyń qyzy Tórtken Kenenqyzy kitaptardyń tusaýkeserin jasady. Kitaptyń tusaýkeser rásimi Óner akademıasynyń "Án-kúı kerýeni" atty mýzykalyq keshine ulasyp, Ramazan Stamǵazıev, Nurjan Janpeıis, Baǵlan Bábijan, Talǵat Muqyshev, Maqsat Medeýbek sekildi ónerpazdar kópshilikti ónerimen baýrasa, akademıa stýdentteriniń ansambli men ánshi,kúıshileri ulttyq ónerge sýsaǵan tyńdarmanǵa tamasha týyndylaryn tartý etti.
N.Kóshimbaı.