2017 jyly 21 sáýirde Qazaqkonsert zalynda tuńǵysh ret Tabyldy Dosymovtyń ánderiniń jelisi boıynsha «Mahabbat aleıasy» atty spektakliniń premerasy ótti, dep habarlaıdy Qamshy aqparattyq agenttigi.
Qoıylym barysynda Tabyldy Dosymovtyń 14-ten astam ánderi jandy daýysta oryndaldy. Ártúrli taǵdyrlardyń bastan keshken mahabbat hıkaıalary sýretteldi.
Sonyń birine toqtalyp ketsek. Aqtóbelik Aınur Súleımenova men tarazdyq Bolat Kárentaev «Bolashaq» baǵdarlamasymen Ulybrıtanıanyń Kardıf ýnıversıtetinde birge oqyǵan. 2005 jyldyń 23 jeltoqsanynda elge bet alǵan qos ǵashyq Aqtóbege Baký arqyly ushatyn áýe kemesine otyrady. Ondaǵy maqsattary Jańa jyl qarsańynda ata-analarynyń ruqsatyn alyp, shańyraq qurý edi, alaıda aspanǵa kóterilgen ushaq birer sátten soń otqa oranyp, Kaspıı teńiziniń arǵy jaǵalaýynda apatqa ushyraıdy. Súńgýirler teńizden marqumdardyń denelerin alyp shyqqanda tańdanystaryn jasyra almady, sebebi ómirleriniń sońǵy sátin sezgen Bolat pen Aınur o dúnıege attansa da bir-birinen ajyrap qalmas úshin qushaqtasyp, ózderin oryndyq belbeýimen baılap tastaǵan eken. Qutqarýshylar qos muńlyqtyń múrdelerin tapqan sátte de olardyń qushaqtasqan boıy kóz jumǵandary belgili boldy.
Aınur men Bolattyń qazasyna búkil el qaıǵyrdy. Talapty, qajyrly eki jas búkil qazaq qaýymy úshin úlken úmit sımvolyna aınaldy. Pák sezimniń sımvolyna aınalǵan qos muńlyq Aınur men Bolattyń esimderin este qaldyrý jolynda kóp ister qolǵa alyndy. Solardyń biri, 2007 jyly Tarazda olardyń atymen «Ǵashyqtar aleıasy» ashylyp, osy aleıada «Mahabbat sımvoly» monýmenti boı kóterdi. Músinshi – K.Kákimov.
Mine, jastarǵa úmit otyn syılaǵan Aınur men Bolattyń júrekterde máńgi saqtalyp qalǵan hıkaıasy spektákl qoıýshylardyń basty taqyryptaryna aınaldy. Mahabbat – máńgilik taqyryp adamnyń tula boıyn áp sátte jaýlap alatyn uly sezim. Mahabbat dámin sezgen adam – júregi shynaıy soǵyp turǵan adam. Tabyldy Dosymovtyń ánderi sondaı uly sezimniń qudiretin árbir janǵa sezdire alady, kóńildi baýrap alady.
Budan bólek, qoǵamda problemaǵa aınalǵan oqıǵalardy arqaý etip, ánmen baılanystyrǵan jastar kórermenniń zor qoshemetine bólendi.
Keshke Tabyldy Dosymovtyń januıasy, uly Abyl Tabyldyuly kelip, ákesiniń óneri áli de dáriptelip jatqanyna qýanyp, jastarǵa alǵysyn bildirdi. Sondaı-aq, kóz kórgen dos-jarandary men ánshi aǵaıyndar kelip, teatr jastarynyń ónerleri órge júzsin dep aq jarma tilekterin aıtty.
Spektákldi qobshy «Almaty-Music» teatry. Teatr jetekshisi, rejıseri T. Omarov. Mýzykalyq jetekshi – A. Aıdynuly.