Aýǵanstandaǵy amerıkalyq kontıngent qolbasshysy Reseıdiń tálibterdi áskerı qarýmen jabdyqtaıtynyn rastady, dep habarlaıdy Qamshy aqparattyq agenttigi centralasian.org-ke silteme bere otyryp.
Dúısenbi kúni Kabýlda ótkizgen baspasóz máslıhaty kezinde general Djon Nıkolson "Reseı tálibterdi qarýmen qamtamasyz etedi degen aqparat qanshalyqty ras" degen suraqqa "Biz kómek kórsetetini jónindegi aqparatty jıi alyp turamyz" dep jaýap berdi.
The Washington Post gazetiniń Pentagondaǵy qupıa derekkózine qaraǵanda, sońǵy jarty jylda Máskeý tálibterge aýyr pýlemeti bar qarý-jaraq tasymaldaýdy kóbeıtken. Onda bul qarý "Islam memleketi" (IM) ekstremıstik uıymyna qarsy kúresýge qoldanylady delingen. Biraq shyn máninde tálibter IM is-qımyl jasamaıtyn Gelmand pen Kandagar aımaqtarynda qoldanady eken.
Baspasóz máslıhaty kezinde sóz sóılegen AQSH qorǵanys mınıstri Djım Mettıs "Eger qarý-jaraq aýǵan úkimetine jetkizilmese, shet memleketten keletin qarý-jaraq halyqaralyq zańdy buzǵan bolyp esepteledi" dedi.
Djım Mettıs tálibter aýǵan armıasynyń bazasyna shabýyl jasaǵannan keıin, eki kúnnen soń Aýǵanstanǵa bardy. Shabýyl kezinde 140-tan astam aýǵan sarbazy qaza tapty. AQSH qorǵanys mınıstri prezıdent Tramptan amerıkalyq ásker sanyn kóbeıtýdi suraýy múmkin. Qazir Aýǵanstanda shamamen 8400 amerıkalyq sarbaz bar.