Qazaqstan pavılonynyń resmı operatory –« Ulttyq kınematografıa óneri men ǵylymdarynyń akademıasy» QB 70-shi Kann halyqaralyq kınofestıvalinde elimizdiń kınoındýstrıasyn usynbaq dep habarlaıdy Qamshy aqparattyq agenttigi.
Birinshi Qazaqstandyq pavılon Le Village International kınonaryǵy aýmaǵynda Festıválder saraıynyń qasynda bolady.
Qazaqstan Ulttyq pavılony –Kann kınonaryǵynda qazaqstandyq kınematografısterdiń jumys isteýine arnalǵan alańsha. Operator retindegi kınoakademıanyń mindeti, elimizdiń kınoındýstrıasynyń qatysýshylaryna, onyń ishinde : kınoóndirýshilerge, prokat jasaýshylarǵa, rental stýdıalarǵa, kınojelilerge pavılondy paıdalanýǵa múmkindik týǵyzý, dedi kınoakademıa prezıdenti Rashıd Nuǵmanov.
Eń aldymen pavılon aýmaǵynda kásibı kezdesýler ótkizýge, fılmder men jobalardy ilgerletý men qyzmetter jóninde kelissózder júrgizýge múmkindikter berilmek.
Halyqaralyq festıválderge qatysý Qazaqstannyń kıno túsiretin el retindegi ımıjin kúsheıtip, birlesken jobalarǵa seriktes izdeýge kómektesedi, el ekonomıkasyna aqsha kelýdi qamtamasyz etý úshin respýblıka aýmaǵynda sheteldik jobalardy iske asyrýdyń keleshegin qalyptastyrady.
Qazaqstandyq kınoındýstrıa salasynda eńbek etip otyrǵandar pavılon katalogyna tegin aqparat ornalastyryp, taratýǵa arnalǵan materıaldy, onyń ishinde lıfletter, broshúralar, flaıerler, óz fılmderi týraly treılerdi, jobalardyń tızerleri men kompanıa týraly beınerolıkterdi kórsete alady. Beıne materıaldar pavılonnyń LED ekrany arqyly 2017 jyldyń 17-28 mamyry aralyǵynda úzdiksiz kórsetilmek.
19 mamyr kúni Fransıanyń Ulttyq kınematografıa ortalyǵynyń alańshasynda Qazaqstan pavılonynyń ashylýyna oraı resmı qabyldaý sharasy ótpek. Baǵdarlamada kameralyq ishekti ansámbldiń súıemeldeýimen Aıman Musahadjaeva men Dımash Qudaıbergenov óner kórsetedi. Oǵan Kann kınofestıvali men kınonaryǵynyń qonaqtary men qyzmetshileri,Fransıadaǵy QR elshiliginiń ókilderi, Kókshil jaǵalaýdaǵy mýnısıpaldy bılikter men kınokomıssıalardyń ókilderi shaqyrylǵan.