Fýtboldan Qazaqstan chempıony Baýyrjan Jolshıev qylmystyq jaýapkershilikke tartyldy, dep habarlaıdy Qamshy aqparattyq agenttigi prosports.kz basylymyna silteme jasap.
«Astana» klýbynyń burynǵy oıynshysy 2016 jyly kúzde «mersedes» avtokóligin mas kúıinde júrgizip, úsh jylǵa kýálikten aıyrylǵan. Alaıda, 2017 jyly 3-shi sáýirde qaıtadan kólik tizgindedi. Bul joly Baýyrjanǵa Qylmystyq Kodekstiń 346-shy babyna sáıkes is qozǵaldy. Teris áreketi úshin fýtbolshyǵa 500 aılyq kórsetkishtik aıyppul salynýy tıis edi. Biraq, sýdıa Oljas Kúrenbekov qaltaly azamatqa mundaı qarajat az dep sanap, jazany 200 saǵattyq qoǵamdyq jumystarǵa aýystyrǵan. Endi Jolshıev Almaty qalasynyń kóshelerin tazalamaq.
İİD-niń baspasóz qyzmetkeri Ǵalymjan Qasenovtyń aıtýynsha, fýtbolshy jumys isteýden bas tartqan jaǵdaıda jazasy aýyrlaıdy. Qarapaıym sózben aıtqanda fýtbolshy bas bostandyǵynan aıyrylýy da múmkin.