QAMSHY JETİMDERDEN SENSASIA JASAMAIDY HÁM NURTAI SABILÁNOVPEN BOLǴAN ÁŃGİME

    Zhazira Baidaly
    QAMSHY  JETİMDERDEN SENSASIA JASAMAIDY HÁM NURTAI SABILÁNOVPEN BOLǴAN ÁŃGİME

    Qamshynyń betinde SHQO Naýaly balalar úıine qatysty «SHQO Balalar úıindegi sumdyqtyń beti ashyldy» degen taqyryppen materıal shyqqan bolatyn. Qazirgi kezde elimizde kóp másele jabýly qazan kúıinde qalyp jatqany bultartpas shyndyq. Jýrnalıser kelip kameraǵa túsirip, ádilettilik talap etpese qarapaıym halyqtyń muńy joǵary jaqqa jetpeıtini de ótirik emes. Bala bizdiń bolashaǵymyz, jetim kórseń jebeı júr deımiz. Jetim balalar teperish kórýde, olarǵa aıǵaılap ursady, tipti keshki assyz qaldyrady, artyǵymen jumysqa jegedi dep jazylǵan shaǵym hatty oqı otyryp biz de eriksiz emosıa berildik. Aqparattyń ras-ótirigin bilmeı jatyp, táýekelge bel býyp, quzyrly organdar atalmysh máselege nazar aýdarsyn, quqyq buzýshylyq shynymen de oryn alsa, kináliler jazaǵa tartylsyn degen nıet-maqsatpen bir býma hatty jarıalaǵan bolatynbyz.  Materıaldy saıt betine shyǵarar aldynda SHQO Bilim berý basqarmasyna zvondap, aldyn-ala mán-jaıdy eskertkenbiz.

    Nazymnyń (hattyń avtory) shaǵymy eldi dúrliktirdi. Sáıkesinshe, pikir jazǵan, shý kótergen oqyrmandar da kóp boldy. «Qamshy» osyndaı daýly materıal jarıalar kezde portal erkin pikir alańy ekendigin, ekinshi taraptyń da túsindirmesin jarıalaýǵa árkez daıyn ekendigin erekshe atap ótken bolatyn. Ýádemiz boıynsha materıal shyndyqqa janaspaıdy, men sol balalar úıiniń tárbıelenýshisimin dep habarlasqan Dmıtrıı Skosnágın degen orys jigitiniń hatyn da oqyrman nazaryna usyndyq. Oryssha jazylǵan hatty redaksıa qazaqshaǵa aýdaryp halyqtyń tarazysyna saldy.

    Arada birneshe aı ótkennen soń QR Parlament Májilisiniń depýtaty Nurtaı Sabılánovpen tildesý barysynda áńgime aýany Naýaly balalar úıine aýdy. Nurtaı myrza óz kezeginde bul máseleden habar ekenin, Qamshyǵa joldanǵan hattyń bir kóshirmesi onyń mekenjaıyna da jiberilgenin aıtty. Máselege beıjaı qaramaǵan Nurtaı Sabılánov Naýaly balalar úıiniń qyzmetkerlerin, tárbıenýshilerin de jaqsy tanıtyn bolyp shyqty.

    «Naýaly balalar úıimen 2000-shy jyldardan bastap tyǵyz baılanystamyn. Dırektoryn da tanımyn. Naýalydaǵy balalarǵa qolymnan kelgen kómekti aıaǵan emespin: kıim-keshek, tehnıkalyq jabdyqpen qamtamasyz etkenmin. Balalarmen áńgime-dúken qurap, birge shaı ishken kezimiz de bolǵan. Bitirip ketken balalar meni jaqsy tanıdy. Kezinde bir top balany Astanaǵa ákelip, elordamen tanystyryp, Parlamentti kórsetip, qydyrtqan bolatynmyn. Birnesheýiniń oqý aqysyn óz qaltamnan tóledim. Keıbireýi áli kúnge sheıin amandyǵymdy surap, habarlasyp turady. Aıtpaǵym, Naýalyda bári jaqsy, balalar tárbıeli, saýatty, tártipti. Mynandaı sumdyq jaıtty estip Naýalyǵa jol tarttym. Mádenıet úıinde turǵyndarmen kezdesemin dep jergilikti basylymǵa aldyn-ala habarlama berdim. 250 adamdaı jınaldy. Zalda ıne shanshar jer bolmady. Naýaly balalar úıindegi jaǵdaı hatta jazylǵandaı jaǵa ustatarlyq bolsa, aýyldaǵylardyń ony estip-bilmeýi múmkin emes. Turǵyndar shaǵymdanýshy Nazymnyń ózine aıyp taqty. Árıne, munyń bári aýyzben aıtylǵan sóz. Quzyrly organdar tekserý jasap, shyndyqty anyqtaıdy. Bizdiki únsiz qalmaý, másele kóterý ǵoı» dedi depýtat myrza.

    Naýaly balalar úıindegi jaǵdaı boıynsha tekserýler júrgizilip, aq-qarasy anyqtalatyndyǵyna biz de qýanyshtymyz. Sebebi Nurtaı Sabılánov uıymdastyrǵan jınalys barysynda «Qamshy» sensasıa qýyp, osyndaı materıal shyǵardy dep dúrlikken aǵaıyn da bolypty. Alash Ordanyń 100 jyldyq mereıtoıyna 500 adamǵa as berip, 100 aǵash egip, endi 100 jetim balany kıindirmek «Qamshyǵa» mundaı sensasıa qajet emes. Áıel kúıeýiniń kózine shóp salyp, ony maqtan tutatyn zamanda urpaq máselesi, balalardyń jaǵdaıy, jetim men jesirdiń úni eskerýsiz, eleýsiz qalmasyn degen oı ǵana.

    Osy oraıdy paıdalana otyryp, «Qamshy» josparlap jatqan «100 jetim balaǵa kómek» is-sharasyna kez kelgen azamat qoldaý bildirip, atsalysa alatynyn eskertkimiz keledi.

    Qamshyger: Jazıra Baıdaly

    Qatysty Maqalalar

    Bárimiz qazaqpyz ǵoı!

    Bárimiz qazaqpyz ǵoı!

    12:57, 06 naýryz 2025