Almaty-Bishkek tasjolynyń 29-shaqyrymynda (Almaty oblysynda) polıseıler Lada kóligin toqtatyp, kóliktiń júksalǵyshynan baılaýly jatqan er adamdy kórgen. Oqıǵa 26 sáýirde keshki ýaqytta bolǵan, - dep habarlaıdy Qamshy aqparattyq agenttigi patrul.kz-ke silteme berip. Júrgizýshiniń qujattaryn teksergen kezde ol qatty kúıgelektengen. Sodan ınspektorlar odan kúdiktene bastaǵan. Osylaısha, olar mańǵystaý nómirimen júrgen kólikti jáne ondaǵy jolaýshylardy tekserýdi sheshken. Biraq bir sátte polıseıler bir dybystar estip, er adamnan kóliktiń júksalǵyshyn ashýdy suraıdy. Sol kezde kóliktiń kómek suraǵan er adamnyń aıǵaıy shyqqan. Basylymnyń málimetinshe, júksalǵyshty ashqan kezde onda qol-aıaǵy plasıkalyq qamytqa baılanǵan er adam jatqan.
Kóliktegi barlyq úsh er adam ustalyp, oqıǵa ornyna Qarasaı aýdandyq İİB jedel-tergeý toby shaqyryldy. Ustalǵan er adamdardyń ekeýi Shymkentke bara jatqanyn, al úshinshi er adam bolsa júksalǵyshta ne jatqanyn bilmegenin aıtady. Tutqynda bolǵan adam olarmen tanys ekenin aıtyp otyr. Olarda ortaq jumys bolǵan eken. Biraq naqty nemen aınalysqandaryn naqtylamady. Múmkin, aqshalaı qaryzdary bar. "Er adam Nexia kóligine janarmaı quıyp jatqanda tutqyndalǵan. Tanystary ony salonǵa ıterip kirgizip, taý jaqqa alyp ketken. Sol jaqta ony soqqynyń astyna alǵan. Sodan ony júksalǵyshqa salyp, Shymkentke qaraı alyp ketpekshi bolǵan", - dedi basylymdaǵylar. Endi polıseıler oqıǵanyń mán-jaıyn anyqtaıdy. Sotqa deıingi tergeý bastaldy.