Sáýir aıynda Qazaqstannyń birneshe oblysynda sý tasqyny tabıǵı apaty boldy. Osyǵan oraı bankter arasynda Halyq bank alǵashqy bolyp, tasqynnan zardap shekkenderge 50 mıllıon teńge qaıyrymdylyq qarajatyn bóldi dep habarlaıdy Qamshy aqparattyq agenttigi.
«Dál osyndaı qıyn-qystaý sátterge Halyk Bank jetekshileri men qyzmetkerleri beıjaı qarap qalmady. Aqtóbe, Aqmola, Qostanaı, Shyǵys Qazaqstan jáne Qaraǵandy oblysynda sý tasqynynan zardap shekkenderge #HalykFund qaıyrymdylyq qory ár óńirge 10 mln teńgeden jalpy somasy 50 mln teńge bóldi.
Qurmetti qazaqstandyqtar, bir kisideı jumyla, kómek qolyn sozaıyq!», - delingen bank habarlamasynda.
Oqyrmandy aqparattandyra ketsek, tótenshe jaǵdaılar komıteti jarıalaǵan 27 sáýir kúngi aqparatqa saı is-sharalarmen Qaraǵandy oblysynda budan buryn sý basýǵa ushyraǵan turǵyn úılerdiń barlyǵy tasqyn sýynan bosatyldy.
Turǵyn úılerdi tasqyn sýyn sorý jáne burý jónindegi jumystar 186 turǵyn úıdi sý basqan Soltústik Qazaqstan, Shyǵys Qazaqstan jáne Qostanaı oblystarynda júrgizilip jatyr.
Sý tasqynyna qarsy is-sharalar Aqmola, Jambyl, Aqtóbe jáne Qaraǵandy oblystarynda da jalǵasyp jatyr.
Avarıalyq-qutqarý jáne kezek kúttirmeıtin jumystardy júrgizýge bir táýlik ishinde TJ komıtetiniń, jergilikti atqarýshy organdarynyń, Ulttyq ulannyń, İİD jáne tartylǵan uıymdardyń 1529 adamy, 345 birlik tehnıkasy, 16 sý sorý qurylǵysy jáne 23 júzý quraly jumyldyryldy.
Birlesken kúshtermen halyq pen úı janýarlaryn evakýasıalaý, sý sorý men burý, qorǵanysh úıindilerin nyǵaıtý, psıhologıalyq kómek kórsetý, qorǵanysh úımelerin monıtorıńteý, qorǵanysh bógenderin turǵyzý, avtojoldar men bóget denesin qalpyna keltirý, qum salynǵan qaptar men ınertti materıaldardy tóseý, topyraq úıindilerin salý, sý aıdyndaryn monıtorıńteý, jaǵalaýdy nyǵaıtý, sý deńgeıin baqylaý, qoǵamdyq tártipti qorǵaý, táýlik boıǵy kezekshilik men patrúldeý boıynsha jumystar júrgizilýde.
Sý tasqyny kezeńiniń basynan beri Aqmola jáne Aqtóbe oblystarynda 86 adam qutqaryldy, Aqmola, Aqtóbe, Jambyl, Qaraǵandy, Soltústik Qazaqstan, Shyǵys Qazaqstan jáne Qostanaı oblystary eldi mekenderiniń 10 106 turǵyny aldyn ala evakýasıalandy. Olardyń ishinde 6 622 adam óz úılerine oraldy, 30 adam evakopýnktterde jatyr, 3454 adam týystarynda ornalastyryldy.
Yqtımal sý basý aımaqtarynan 21102 bas aýyl sharýashylyǵy janýarlary men qustar qaýipsiz jerge kóshirildi. Qazirgi ýaqytta 16 240 bas mal men bas jeke sharýashylyqqa qaıta keldi.
Qaýipti ýchaskelerde 44708 metr ýaqytsha bógen turǵyzyldy, ınertti materıaldary bar 228019 qap toltyrylyp, tóseldi, 1,5 mln. tekshe metrden astam sý soryldy.
Soltústik Qazaqstan jáne Aqmola TJD-da «qaýyrt jeli» telefondary jumys isteýin jalǵastyryp jatyr.
