Irannyń astanasy Tegeranda ótken 35-shi Halyqaralyq Fadjr kınofestıvalinde rejıser Sábıt Qurmanbekovtyń «Oralman» fılmi sheteldik fılmder arasynan top jaryp, Bas júldeni - "Azıanyń úzdik fılmi" júldesin jeńip aldy dep habarlaıdy Qamshy aqparattyq agenttigi. Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasy túsirgen atalmysh fılm osy festıváldiń «Shyǵys Panoramasy» seksıasynda 12 elden kelip túsken 15 tolyqmetrajdy kartınamen baq synady.
Esterińizge sala ketsek, «Oralman» fılmi týǵan jerinen ketýge májbúr bolǵan, alaıda ondaǵan jyldar ótken soń Aýǵanstannan eline qaıta oralǵan qandastarymyz jaıly baıandaıdy. Fılmge Dýlyǵa Aqmolda, Esim Segizbaev, Erjan Túsipov, Shynar Asqarova, Baıan Qajnabıeva syndy qazaqstandyq tanymal akterler túsken.
- Fılmniń túsirý tobyn osy alǵashqy jeńispen quttyqtaımyn, - dedi kartınanyń rejıseri Sábıt Qurmanbekov.
Fadjr halyqaralyq festıvaliniń negizi 1982 jyly Irannyń mádenıet mınıstrligi jáne ıslam baǵyty uıymymen qalanǵan. Festıvál Qıyr Shyǵystaǵy eń aýqymdy ári tanymal jáne álem kınematografısteri mádenı baılanys ornata alatyn birden bir alań esepteledi.
Aıta ketetin jaıt, Fadjr kınofestıvaliniń negizgi baıqaýynda ár jyldary «Qazaqfılm» kınostýdıasynyń fılmderi qatysqan bolatyn, mysaly: Serik Aprymovtyń «Sońǵy aıaldama», Ardaq Ámirqulovtyń «Qosh bol, Gúlsary» (Arnaıy júlde, 2010 j.), Dárejan Ómirbaevtyń «Stýdent», Aqan Sataevtyń «Jaýjúrek Myń Bala» (júlde, 2013 j.), Emır Baıǵazınniń «Aslannyń sabaqtary» (Arnaıy júlde, 2014 j.), Ermek Tursynovtyń «Shal» (tehnıkalyq jáne kórkemdik jaǵynan úzdik kórinisteri úshin arnaıy júlde, 2014 j.) fılmderi qatysqan bolatyn. Ótken jyly «Fadjr» kınofestıvalinde Erlan Nurmuhambetovtyń «Jańǵaq tal» fılmi «Úzdik rejıser» júldesin aldy.
Fılm jaıly: Fılm HH ǵasyrdyń 30-shy jyldary qyzyl áskerdiń jendetterinen Aýǵanstanǵa qonys aýdarýǵa májbúr bolǵan qazaq otbasy týraly. Bas keıipker Bazarbaı qarttyń bir qyzy men uly sol jaqta dúnıege keledi. Balalary eseıip, otbasyn qurady. Uly Saparqul jergilikti pýshtýn ultynan kelinshek alady. Al qyzy aýǵan jigitine turmysqa shyǵady. Saparqul soǵys kezinde modjahetter jaǵynda soǵysady. Jyldar ótedi. Bazarbaıdyń otbasy Qazaqstanǵa kóshýge ruqsat beretin kvota alady. Barlyǵy jolǵa jınalady. Taýly qyshlaqtan shyqqan otbasyny uzaq jol kútedi.
