QR Úkimeti terorıstik áreket úshin azamattyqtan aıyrý jónindegi túzetýlerdi maquldady. Alaıda QR Aqparat jáne komýnıkasıalar mınıstri Dáýren Abaevtyń pikirinshe, bul másele boıynsha túbegeıli baılam jasaýǵa erterek. 

«Bul másele ázirge belsendi talqylaný ústinde. Men zań qabyldanardan buryn barlyq pikirler eskeriledi degen oıdamyn. Bul jerde mańyzdy bir másele bar. Terorıstik áreketterdiń aýmaǵy álem boıynsha keńeıe túsýde jáne ol túrli jaǵdaılarda júzege asyrylýda. Terorızmmen kúrestiń naqty tıimdi ádisi áli tabylǵan joq. Álem elderiniń barlyǵy qal-qaderlerinshe ony izdestirýde. Shveısarıada terrorısterdi azamattyqtan aıyrý jónindegi másele birneshe márte kóterildi. Sondaı-aq atalmysh taqyryp álemniń kóptegen elderinde talqylanýda»,-dedi mınıstr «Habar» telearnasyndaǵy «Ashyq dıalog» atty joba aıasynda.

Dáýren Abaevtyń sózinshe, zań jobasynyń bul normasy shet memleketterde soǵysyp júrgen azamattarǵa baǵyttalǵan.

«Biz áskerı qımyldarǵa úırengen adamdardyń elimizge kelip, qaýip tóndirýin qalamaımyz. Bul másele boıynsha naqty sheshim qabyldanǵan joq, taqyryp talqylanýda. Budan da jan-jaqty usynys, pikirlerdi biz Parlament qabyrǵasynda tyńdaımyz»,-dedi Abaev.