7 mamyr kúni Astanada QR Qarýly Kúshteriniń qurylýynyń 25 jyldyǵy men 1941-1945 jyldarǵy Ekinshi dúnıejúzilik soǵystaǵy Jeńiske arnalǵan sherý ótedi. Bul táýelsiz Qazaqstan tarıhyndaǵy eń iri áskerı parad bolady dep habarlaıdy Qamshy aqparattyq agenttigi Astana ákimdiginiń baspasóz qyzmetine silteme jasap.  

«Áskerı parad jeke quram men tehnıkalar sany boıynsha el tarıhyndaǵy eń iri sherý bolmaq. Oǵan jaıaý áskerlerdiń 30-ǵa jýyq paradtyq eseptoby qatysady. Olardyń quramynda 5 myńnan asa áskerı qyzmetshi saltanatty marshpen júrip ótedi. Sondaı-aq sherýge 300-ge jýyq áskerı tehnıka, 80-ge jýyq ushý apparaty tartylady.

2017 jylǵy áskerı paradtyń ereksheligi - aýmaqtyq qorǵanys brıgadalarynyń paradtyq jaıaý eseptoptarynyń, barlaýshylar rotasynyń jáne elimizdegi tórt «Jas ulan» mektebiniń barabanshylar rotasynyń, sondaı-aq QR Qorǵanys mınıstrligi áskerı-tehnıkalyq mektebi tehnıkalarynyń tartylýy.

Elorda ákimdiginiń qaýlysymen 8 sáýir - 8 mamyr aralyǵynda sharaǵa Astana qalasynyń 50 aýmaqtyq qorǵanys brıgadasy shaqyryldy. Olar áskerı paradqa alǵash ret qatyspaq.

Oqyrmannyń esine salsaq, 1992 jyly 7 mamyrda Qazaqstan Prezıdenti N.Á.Nazarbaev: «Qazaqstan Respýblıkasy Memlekettik qorǵanys komıtetin Qazaqstan Respýblıkasynyń Qorǵanys mınıstrligi etip qaıta qurý týraly», «Qazaqstan Respýblıkasynyń Qarýly Kúshterin qurý týraly» jáne alǵashqy qorǵanys mınıstri etip general polkovnık (1993 jyldyń 9 mamyrynan armıa generaly) S.Q.Nurmaǵambetovty taǵaıyndaý týraly jarlyqtarǵa qol qoıdy. Bul kún Qazaqstannyń derbes Qarýly Kúshteriniń qurylǵan kúni bolyp tarıhqa máńgi óshpesteı jazyldy.

Aıta keteıik, bıylǵy 2017 oqý jyly «Qarýly Kúshterdiń 25 jyldyǵyna – joǵary jaýyngerlik ázirlik!» uranymen ótip jatyr.