Búgin Islam.kz saıtynda Qorǵanys mınıstri Sáken Jasuzaqovtyń musylmanshylyqqa til tıgizgendigi jaıynda maqala jarıalandy.

Qorǵanys mınıstri Sáken Jasuzaqov qatty qatelesti. Ol Parlament Májilisiniń depýtaty Saýytbek Ábdirahmanovtyń "áskerler arasynda radıkaldy kóńil kúıde júrgen qansha dinı fanattar bar?" degen suraǵyna jaýap beremin dep búkil musylman qaýymnyń ashýyn týǵyzatyn sóz aıtqan. Mınıstr bylaı deıdi. "Sredı nas net lúdeı, kotorye hodát v mechet ılı eshe chto-to delaıýt". Mınıstrdiń munysyn qalaı túsinemiz?

Óz áletimizshe tápsirlep kórelik.

1. Táýelsiz Qazaqstannyń ásker sapynda júrgenderdiń ishinde meshitke baratyn bir adam bolmaǵany ma? Bul birinshiden qýanyshty jaǵdaı emes. Sebebi, meshit pen radıkaldyq aǵymdy baılanystyra sóıleý mınıstrdiń deńgeıiniń taban astyna túskenin kórsetedi.

2. Mınıstr aıtqandaı-aq bolsyn! Sonda bul máseleniń ekinshi jaǵy qylań bermeı me? Demek meshitke baratyndar radıkaldy kózqarasta bolǵany ǵoı. Qazir qazaq jastarynyń 70-80 paıyzy juma namazǵa qatysatyn kórinedi. Mınıstr sol búkil qazaqtyń jastaryn qaralap otyrǵan joq pa? Osy 70-80 paıyz jastyń áskerge barmaıtynyna Jasuzaqov kepildik bere ala ma?

3. Jasuzaqovtyń "ılı eshe chto-to delaıýt" degeniniń astarynda namaz oqý degen uǵym jatqany aıtpasa da túsinikti. Imandylyqqa bet burǵan jastardan qorqatyn mınıstrdiń oıyn túsiný qıyn.

4. Jalpy, memleket tizginin ustap otyrǵan laýazymdy tulǵalar aýzyna abaı bolýy kerek. Egerákı, budan keıin bizdiń elde túrli lankestik áreket bola qalsa (Qudaı betin ári qylsyn), birinshi bolyp Qorǵanys mınıstrligine shabýyl jasaýy ábden múmkin. Oǵan Jasuzaqovtyń myna bir sózi tolyǵymen sebepshi bola alady.

5. Radıkaldyq uıym men dástúrli ıslamdy shatastyrý mınıstrlikke opa ápermeıdi. Adam balasy túbi o dúnıelik bolary anyq qoı. Myna sózdi aıtqan Jasuzaqovtyń janazasy shyǵarylmaı ma? Árıne, shyǵarylady. Sonda tabyttaǵy mınıstrimiz "radıkaly... chto-to delaıýt" dep jatpasyna kim kepil?

Musylman bolyp týdyq, musylman bolyp ólemiz. Osyny bıliktegiler umytpasa eken.

Sháriphan Qaısar