Ońtústik Qazaqstan oblysynda segiz jylǵa sottalǵan Álıma Úsenovanyń artynda bes birdeı balasy qaldy. Ózin qorǵamaq bolyp, ishimdik ishken kúıeýine pyshaq sermegen kópbalaly anaǵa sot osyndaı qatań úkim shyǵarǵan, dep habarlaıdy Qamshy aqparattyq agenttigi 31 telearnasyna silteme jasap.

Áleýmettik jelilerde jazaǵa qatysty pikir bildirýshiler legi tolastar emes. Ásirese, áıelge jany ashyǵan pikirler jaǵy basym.

Ońtústik Qazaqstan oblystyq qylmystyq ister jónindegi aýdanaralyq mamandandyrylǵan soty kúıeýiniń júrek tusyna pyshaq suǵyp óltirgen 29 jastaǵy bes balanyń anasyn 8 jylǵa bas bostandyǵynan aıyrýǵa úkim shyǵardy. Mas erinen qorǵanǵan anaǵa qatysty jazany tym aýyr deýshiler áleýmettik jelide pikirlerin jarysa jazýda. Kópshilik istiń qaıta qaralǵany jón dep esepteıdi.

«Sot ádildikpen sheshý kerek! Bes balanyń obalyna qalmańdar, sheshesi bolmasa olar kimge kerek! Osy jyndy sýdyń kesirinen talaı erkek ne istep ne qoıǵanyn bilmeıdi, názik áıel jandy uryp-soǵyp, qyz balany zorlap jatady! Bosatylsyn Alıma! Balalaryn tárbıelesin!»,-dep jazǵan jeli qoldanýshysy.

«Pedofılder, mashınamen adam óltirgen baılar, mıllıondap para alǵandar bosap shyǵady da, ózin qorǵaǵan jazyqsyz áıelge 8 jyldy qalaı uıalmaı berdi eken?»,-degen pikirde Qazaqstan azamaty.

«Kólikpen adam qaqqan Úskenovti bosatady da, al ózin-ózin qorǵaǵan jandy qamaıdy. Sonda endi qorǵanýǵa da bolmaıtyn boldy goı? Shartty jaza bolsa da bolatyn edi»,- deıdi  jeli qoldanýshysy.

Jańa jyldyq keshte qonaqtardy kútýmen bolǵan erli-zaıypty arasynda, bári tarqaǵan ýaqytta kıkiljiń týyndaǵan. Osy kezde bes balanyń anasy Álıma Úsenovaǵa mas bolǵan eri kúsh kórsete bastaǵan. Sózinshe, soqqydan qorǵanyp, qorlyqqa shydamaǵan ol kúıeýine pyshaq siltegen. Azamat oqıǵa ornynda qaıtys bolyp, bes balanyń anasyna tórt aıdan soń qatań úkil oqylǵan.

«Jazany túzeý kolonıasynyń jalpy rejımde óteý belgilensin. Jazany óteý merzimi 2017 jyldyń 1-qańtarynan bastap eseptelsin. Oǵan qatysty tańdalyp alynǵan bultartpaý sharasy buryńǵysynsha kúzetpen ustaý qaldyrylsyn»,-deıdi OQO Qylmystyq ister boıynsha mamandandyrylǵan aýdanaralyq sotynyń sýdıasy Samıdın Temirálıev.

Al sottalǵan Álımanyń bes balasynyń biri áli emizýli náreste eken. Al úlkeni bolsa,nebári segzi jasta.